Gabinete ME II: Minister Bermudez a entrega presupuesto suppletorio 2014
Diahuebs atardi 6 di November, Minister di Finanzas Angel Bermudez a entrega e presupuesto supletorio 2014 na Sr. Gobernador Fredis Refunjol, pa esaki wordo entrega na Staten pa aprobacion despues di un tratamento publico.
E documento aki ta basa riba e conseho di Raad van Advies despues cu Sr. Gobernador a haya un instruccion di Hulanda pa no firma e presupuesto original 2014, prome cu haci un estudio di e calculacionnan concerni.
E estudio aki a keda ehecuta pa e secretariado di College Financieel Toezicht (Cft) cu tambe ta e organo encarga cu supervision presupuestario pa Corsou y St. Maarten. E minister a procesa e recomendacion di e expertonan Hulandes combina cu e ultimo desaroyonan den e finanzas publico di Aruba, pa actualisa e presupuesto original.
Un di e recomendacionnan tabata pa inclui un proyeccion multi-anual di e presupuestonan venidero, pa asina proyecta e rumbo cu e maneho di gobierno mester bay. E maneho aki mester garantisa un maneho di finanzas publico solido den futuro, caminda cu na 2018 mester yega na un zero deficit.
Asina e ora ey por cuminsa reduci tambe e debe nacional di ultimo 25 añanan, pa Aruba tin un base financiero economico sano pa su futuro. Minister Bermudez a remarca cu awo cu e presupuesto ta revisa, no tin motibo mas pa Sr. Gobernador abstene su firma bou di e presupuesto original, finalisando asina un proceso extraordinario cu a pone cu e presupuesto 2014 ta keda formalisa na vispera di fin di aña.
Finalmente minister Bermudez ta gradici tur esunnan cu a contribui den e proceso aki, tanto e empleadonan publico di diferente departamento, como e expertonan Hulandes, y e ta spera cu conhunto nan lo aporta tambe pa por finalisa e presupuesto 2015 pronto.
FIN
Expresionnan haci den e articulo aki no necesariamente ta refleha opinion di ArenaPoliti.co