E ta mas cu logico tur cos lo subi si cambia sistema di cobra motorrijtuigenbelasting. Pueblo no mester lubida cu nos bida diariamente ta depende di transporte den tur sentido. Sea cubo ta subi bo auto pa bai trabou of drenta un supermarket pa cumpra un producto bo lo hayabo mes confronta cu consecuencia y efectonan negativo si bai over na cobra motorrijtuigenbelasting den accijns. Pesei e ta hopi importante pa pueblo wordo informa den ki forma e por wordo perhudica.

Efectonan directo
Si Gabinete Eman yega asina leu pa continua cu e cambio un cuidadano lo por haye ta paga facilmente 2-4 biaha mas na loke e sa paga pa aña na nummerplaat. Esaki riba su mes lo tin un impacto riba e entrada di abo como cuidadano y lo afectabo tur luna tambe. Aparte di esei automaticamente prijs di transporte publico lo subi. Dus esun cu no tin auto ta bai haye ta paga mas pa e por yega su destino. Taxistanan, esnan cu ta traha den sales y esnan cu ta biba pariba di brug sin duda ta e grupo cu lo wordo afecta drasticamente debi na tankmento di gasoline cu un frecuencia halto pasobra nan ta core mas den kilometrahe. Logicamente e hecho cu lo ponebo paga mas pa por move rond Aruba lo debilita bo finansas y presupuesto personal pasobra atras bo ta bai. Netamente pa esaki no mester tin duda cu cambio den sistema di cobra motorrijtuigenbelasting ta afecta bo poder di compra.

Producto lo bai subi
Aruba ta un pais importador nificando cu ora un container yena cu producto yega waf esaki lo mester wordo transporta y cana e ciclo pa yega te na e man di e consumidor. Den teoria tin diferente "distrubutiekanalen" (e proceso cu e producto ta cana te ora e ta den man di consumidor). Door cu mayoria cos ta draai rond di transporte y e costo di gasoline/diesel ta un componente cu ta crucial ta nifica e ora ey cu unabes esaki conoce un aumento dibiaha Tur otro cos lo subi!

Scenario 2x transport
Ora cu un producto yega waf mayoria di biaha un cargo company ta esun cu ta regla papel y encarga pa transporta esaki. E scenario cu mas ta conoci na Aruba ta cu esaki lo yega na un wholesaler. E wholesaler hopi biaha tin cu tene cuenta cu por ehempel e costo di e producto of carga y tambe costonan relaciona cu e servicio di transporte. Na su lugar e wholesaler tambe ta transporta e producto na un cumprador cu den e caso aki por ta un supermercado of minimarket.

Si resulta cu costonan di gasoline of diesel bai laira door di e cambio den cobransa den accijns lo nifica cu ora e carga wordo transporta for di waf na e wholesaler e lo wordo cobra MAS door di e cargo company. Dus prijs di e carga ta mas halto. Pero e wholesaler riba su mes tambe ta wordo confronta cu e hecho cu prijs a bai halto nificando cu ora e transporta e producto na un supermercado of minimarket e lo bai cobra esaki riba e producto. Finalmente e supermercado of minimarket lo tene cuenta cu tur esaki y pone un prijs riba e producto pa despues pone riba su reki.

Si yega asina leu pa ehecuta e medida aki manera nan tin pensa esaki lo ta devastador pa e poder di compra! E ta un hecho cu e cuidadano den tur forma sea na un manera directo of indirecto lo bai bira victima di efecto inflatorio cu esaki lo trece cune. Ta importante pa pueblo realisa cu kier of no prijs di productonan di uso diario y tambe servicionan lo subi debi cu si gasoline/diesel bai halto gastonan di transporte tambe lo bai halto y wordo calcula den e prijs pa e consumidor!

Expresionnan haci den e articulo aki no necesariamente ta refleha opinion di ArenaPoliti.co