Gabinete ME II: Prome Mininster di bisihta den bario di Brazil
E tabata hopi interesa pa mira pa su mes e ultimo desaroynan den e bario, entre otro renobacion di scol, Misa y cancha deportivo pa hobennan
ORANJESTAD – Prome Minister Mike Eman tabata di bishita diabuebs na Brazil. Ta importante, segun Prome Minister pa no unicamente bishita un bario pa haya sa necesidad y sugerencianan di e ciudanonan, pero tambe pa bolbe e bario pa wak con e desaroyo di loke a traha riba dje a sigui.
E bishita na Brazil ta uno cu precisamente ta pa e motibo ey. Tabata tin hopi desaroyo den e bario y por mira esaki. Bishitando scol basico St. Michael, el a wordo ricibi cu hopi alegria pa e studiantenan. E scol, un di e dos scolnan di e bario, su speelplaats a wordo drecha y a haya un capa nobo di asfalta y airco a wordo instala. Prome Minister a haya un recorido di e scol y a combersa cu cabesante juffrouw Quandus cu a papia cu Sr. Eman algun deseo di e scol.
Cristo Rey tambe ta un otro scol di e bario cu a conoce un renobacion grandi y moderno. Ademas di esaki e habitantenan a haya un cancha di bala nobo banda di Centro di Bario Brazil, tratando di e forma aki pa duna principalmente e hobennan mas espacio pa recrea na un forma sano.
Durante un bishita anterior a papia di e mehoracionnan cu Pastoor Jairo Maduro kier haci na Misa Cristo Rey y mesora Prome Minister Mike Eman a pone trahadonan y departamentonan di Gobierno disponibel pa yuda mas tanto posibel. E hecho aki a wordo masha aprecia pa Misa Cristo Rey y su fielnan, principalmente pasobra diadomingo awor nan lo ta celebrando nan 60 aña di existencia.
Prome Minister, despues di un combersacion largo cu Pastoor Jairo Maduro, a bishita varios cas unda cu a scucha deseo y sugerencia di habitantenan pa nan bario y Aruba en general.
Prome Minister Eman na final a expresa di ta hopi contento cu e mehoracionnan cu el a mira cu a keda realisa despues di promesa cu su Gobierno a haci y a priminti cu lo sigui traha pa duna un y tur un miho calidad di bida.
Expresionnan haci den e articulo aki no necesariamente ta refleha opinion di ArenaPoliti.co