Gabinete ME II: Expertonan interesa den e aspecto legal di e transicion pa 100% sostenibilidad a bishita Prome Minister Mike Eman
Recientemente Prome Minister di Aruba, Mike Eman a haya bishita di dos representante di Facultad di Derecho di Universidad di Aruba na Bestuurskantoor. Ta trata aki di docente principal di derecho administrativo y estatal y vice-decano mr. Dr. Viola van Bogaert, compaña pa profesor invita di “Ley y Regulacion Inteligente”, prof. Mr. Dr. Michiel Heldeweg.
E combersacion tabata relaciona cu un proyecto di e facultad den cua ta investiga si mester y con reglamentacionnan por contribui na un transicion pa suministro energetico sostenibel pa Aruba. Prome Minister a duna un splicacion di e plan y proyectonan cu gobierno ta trahando riba nan y a mustra su interes pa trece dilanti ley y reglanan energetico y estudionan pa determina e posibilidadnan di con leynan por duna sosten na haci Aruba ‘energeticamente neutral’.
Profesor Heldeweg ta un profesor Hulandes di “Ley, Gobernabilidad y Tecnologia” na Universidad di Twente. E ta haci estudio di e rol cu Ley tin den innovacion tecnologico, particularmente cu energia sostenibel. E ta hopi entusiasma cu e obhetivo di Aruba pa haci e transicion pa sostenibilidad, no unicamente pa motibonan ecologico, pero tambe pa motibo di sostenibilidad social; pasobra e dosnan aki no por desaroya un, sin e otro.
Cu huristanan di Universidad di Aruba por duna un aporte na e transicion di un banda, ta algo natural, specialmente mirando proyecto ‘Green Faculty’ cu ta wordo maneha pa mr. Dr. Glenn Thodé. Pero di otro banda, e ta un reto hopi serio pasobra ainda tin hopi trabou pa haci. Nan a expresa di ta hopi contento cu e sosten di Minister President a duna nan cu e estudio huridico aki.
Riba termino corto ta bay elabora riba un propuesta y ta bay forma un grupo di stakeholdernan social, cu ta bay guia e proyecto. E motibo ta cu e proyecto di investigacion aki mester ta relevante na final pa tur cu tin e sostenibilidad Arubiano na pecho, of net no tin e na pecho, pero di tur manera ta bay sinti e efectonan di un transicion pa sostenibilidad.
Expresionnan haci den e articulo aki no necesariamente ta refleha opinion di ArenaPoliti.co