Den 2015 tambe Gabinete Eman a gasta mas cu a ser presupuesto y pesey poco dia pasa Parlamento a recibi e presupuesto suppletorio di Pais Aruba pa 2015, den cual Gabinete Eman ta pidi autorisacion pa gasta mas fondo publico. Remarcabel ta cu Gabinete Eman a abusa sin control di fondo publico y awor ta core bende edificio di gobierno den pura pa por yega na placa pa por sera e buraco den e presupuesto di 2015.

Desesperacion ta pone Eman bende patrimonio publico
E ta un berguensa pa lesa riba pagina 30 di e Ley di presupuesto suppletorio di 2015, con Gabinete Eman ta bay bende edificio Hulpbestuurskantoor Noord, Warda di Polis na Playa, Ex Domeinbeheer na Paardenbaaistraat y e edificio di Minitserio Publico na Playa. Anto tur e edificionan aki pa e prijs di baca flaco di 11 miyon florin. Ora cu como Gobierno bo ta recuri na bende patrimonio di Pueblo ta un conclucion nos por saca di esaki, desesperacion pa placa ta pone Eman bay asina lew di bende patrimonio publico.



Ainda falta santana y school publico pa wordo bendi
Ta parce manera cu cada ves cu un Gobierno di signatura Eman ta na mando nan ta busca tur forma pa bende patrimonio di Pueblo. Tempo di ex Minister Tico Croes di AVP ainda nos por corda con e mandatario aki kier a sea bende of hypoteca tur santana y school publico pa por a yega na placa. Ta tristo pa mira cu nada no a cambia y cu Mike Eman tambe tin e mesun plan, bende patrimonio di Pueblo pa yega na fondo pa sigi malgasta esaki pa por bende Pueblo su farce berde. Anto mas tristo ta cu ta bende patrimonio di Pueblo na prijs di baca flaco y mas cu claro esnan cu lo cumpra e edificionan aki sea lo ta amigonan of sponsernan di partido. Pasobra ta pa nan Mike Eman ta goberna y no pa Pueblo.

No por bende sin autorisacion di Parlamento
Mester indica cu Gabinete Eman no por bende e edificionan aki sin cu Parlamento duna autorisacion pa esaki. Pero e realidad tristo ta cu den Parlamento tin 13 parlamentario di AVP cu no tey eynan pa representa Pueblo y defende interes di Pueblo. Di adelanta nos sa cu Baba y su ‘bende’ lo sigi nan ‘masters voice’ y lo bay pro pa bende patrimonio di Pueblo na prijs di baca flaco pa asina amigo y sponser di partido AVP por keda biba lekker. Pasobra ta esaki ta e Gobierno di signatura Eman, malgasta tur locual ta di Pueblo y tene sponser contento pa nan por keda na poder. Berguensa!

15 december 2015

Expresionnan haci den e articulo aki no necesariamente ta refleha opinion di ArenaPoliti.co