Andin Bikker, lider di Partido Democracia Real tabata fuerte den su critica riba e maneho di minister di husticia, pa cu tereno di husticia y seguridad. E tema aki tabata su prome punto cu el a elabora den conferencia di prensa semanal di PDR diamars.

El a bisa cu Aruba no a conoce un ola di criminalidad, manera esun cu desata den e ultimo seis añanan di gabinete Mike Eman I y II.

Minister di Husticia cada bez ta busca excuse, menciona indice y tur sorto di estadistica pa bisa cu mundialmente criminalidad ta subi y asina purba hustifica cu aki na Aruba delincuencia ta suta nos pueblo tur dia.

Net e minister cu tin cu garantiza e seguridad di Aruba a presta pa bay bisa pueblo pa prepara pasobra high season ta biniendo cu aumento di, criminalidad, segun Bikker.

El a bisa esaki pasobra cada dos pa tres siman tin atraco. Un taxista a wordo tira na su wowo, den sector di turismo y armanan tipo militar ta wordo uza pa asalta joyerianan bista di turistanan pero e minister aki ta keda busca excusa  bisando cu no tin fondo.

A compara esaki cu un hende cu no sa landa y haya un zwembroek bunita cu no ta yude siña landa.

El a cuestiona diferente biaha caba cu e minister encarga  no ta compronde su cartera tocante combatimento di criminalidad y husticia, y segun PDR e mester saca su conclusion.

Bikker a bisa cu un pais no ta un hende y un hende no ta un pais y no por ta asina cu nos pueblo pa seis aña largo ta wordo confronta cu un inseguridad hamas bisto, mientras cu Partido AVP a campaña seis aña pasa cu e ta bay trece trankilidad, cu lo combati criminalidad, cu nan tin solucion pa tur cos, pero aworaki seis aña a pasa pero PDR ta constata cu nos pueblo ta sufriendo di inseguridad.

Cada dos pa tres dia tin un atraco, prisioneronan ta jump up riba dak di KIA, armanan pisa ta move den area di turismo pa ataca joyeria, pero minister ta haci manera nada ta pasa y otronan tin falta menos e mes, loke pa PDR ta inaceptable.

PDR ta informa e minister cu un par di aña pasa ainda New York tabata un di e ciudadnan mas insigur na Merca cu barionan cu hendenan no tabata durf di drenta te cu a bin un persona yama Rudy Guliani cu a bira full e trend eynan conviertiendo e ciudad den uno hopi safe, y esey ta mustra cu tin solucionnan.

Kiermen, tin solucionnan. Un pais manera Merca bo por cumpra arma na tur skina, y asina mes por mira cu na New York nan a trece seguridad bek.

Pero logico cu mester tin e vision, e capacidad y e boluntad pa logra esaki y obviamente e minister carece di esey.

E no tin e vision, kizas tampoco e amor pa su cartera pues e kier a bira Minister di Salud pero el a wordo pusha pa tuma e cartera di husticia.

Bikker a bisa cu ta tempo pa haci algo  pasobra nos pueblo no por keda asina aki cu constantemente, tur siman criminalidad ta aumenta y e minister semper ta bin cu excusa. Si e no por soluciona e problema, anto e mes ta parti di e problema segun e lider di PDR ken ta urgi Gabinete Mike Eman cu ainda ta den gobierno pa busca un solucion mirando cu criminalidad ta afectando nos pueblo y nos turismo cu ta e unico pilar economico cu ta resta nos economia.

Expresionnan haci den e articulo aki no necesariamente ta refleha opinion di ArenaPoliti.co