Entrega di declaracion di winstbelasting 2014  

ORANJESTAD – Recientemente Departamento di Impuesto a confirma cu ta extende e ultimo dia cu por entrega e declaracion di winstbelasting 2014 y haci e pago correspondiente pa 1 di Februari 2016. Minister di Finanzas, Angel Bermudez ta satisfecho cu principalmente esunnan cu ta cumpli cu e deber di no solamente paga nan winstbelasting 2014 pero tambe ta haci'e na tempo, por conta cu flexibilidad di parti di Departamento di Impuesto.

"Ta importante pa encurasha esunnan cu ta puntual y ta cumpli cu nan deber pa paga impuesto manera debe ser. Mi ta hopi satisfecho cu DIMP a logra otorga un periodo di prolongacion na cuminsamento di aña pa entrega di e VAS", Minister Bermudez a expresa.

E mandatario ta compronde cu no ta facil pa adapta na e cambionan cu a tuma luga recientemente pa loke ta e declaracion y pago di 'winstbelasting', specialmente den e temporada di fin aña, sin embargo e ta spera cu e prolongacion aki ta facilita e trabou di tur cliente, particularmente esunnan cu semper a cumpli y ta puntual cu nan responsabilidadnan.

Na mes momento e mandatario ta recorda tur cliente di Departamento di Impuesto cu a anuncia cu pa motibo di e cambio di ley di winstbelasting, e winstbelasting aki no ta un 'aanslagbelasting' mas sino un 'aangiftebelasting'.  

Den caso cu un cliente no alcansa pa entrega su declaracion definitivo pa dia 1 di februari 2016,  e cliente lo mester entrega un declaracion provisional ("voorlopige aangifte") y haci e pago correspondiente cu ta fungi automaticamente como un peticion pa prolongacion di termino.

Finalmente Minister Bermudez a menciona tambe cu pa esunnan cu no cumpli cu entrega di e declaracion provisional y/of e declaracion definitivo, e cliente lo haya un cobransa adicional esta un 'naheffingsaanslag' y un boet.

Esaki tambe ta e caso si acaso e cliente a paga un suma menos cu locual el a declara na winstbelasting. E boet pa no cumpli cu entregamento di e declaracion ta maximo Afl. 2.500,-. Si no haci e pago di winstbelasting of no haci e pago corectamente, e boet ta maximo Afl. 10.000,-.
E mandatario ta gradici empleadonan di DIMP pa nan bon trabou te cu e ultimo dianan di 2015!

Expresionnan haci den e articulo aki no necesariamente ta refleha opinion di ArenaPoliti.co