Partido ABO: Bon aña, pa ken?
E aña bieu a cera y e aña nobo a habri cu e mesun cantaleta di propaganda politico, pa sconde e berdad di pueblo y asina trata di laga pueblo lubida un biaha mas riba e realidad amargo di tur dia y e decadencia social y moral di nos sociedad.
Despues cu e minister di Energia a hinca e pueblo den un debe adicional di 300 miyon florin, cu su aventura di ‘WEB-hedging’ y cu el’a aumenta e prijs di awa y coriente cu 15%, awor e minister kier bay hunga e papel di ‘e bondadoso’. E minister, despues di su show di ‘CITGO y e supuesto reapertura di refineria’, dia 31 di december ta anuncia un reduccion di 10% di e prijs di awa y coriente na februari. Gran cos, minister! Kisas e minister a lubida cu ainda WEB y ELMAR a keda cu 5%. Pues ki reduccion? Banda di esaki, pueblo no ta beneficia di e caida continuo di e prijs di crudo, cu awe ta na US$ 36. Pa complementa su obra ‘bondadoso’ di tira pinda pa pueblo, e minister ta publica den algun medio di comunicacion un pagina full na color di proyectonan ya anuncia y cuestionabel bou di e titulo ‘E aña di oportunidad’. Dus pa esunnan cu no a ripara, e campaña electoral a cuminsa, cu defacto nunca a termina. E pregunta ta, ki dia pueblo lo ripara cu e tipo di maniobranan asina ta nada mas cu un ripiticion continuo di e mesun proyectonan dudoso, cu tin e unico meta pa laga pueblo kere cu tur cos ta bon. E ‘establishment politico’ semper a uza e tacticanan di propaganda aki, pa por keda na poder y asina e enrikecimento personal y e destruccion di e pais por sigui. Shonnan, Aruba ta bancarota, politicamente dividi, conoce hopi pobresa y e tin un monton di problemanan social cu ni un pagina full na color di propaganda politico, por tapa.
Algun ehempel di e problemanan social cu a sosode solamente den e ultimo dianan:
- Hortamento di AWG. 30.000 for di un cas di un oficial di polis y AWG. 12.000 for di ‘The cinemas’;
- Hortamento y destruccion na un scol;
- 15 hende deteni durante e evento di ‘Fakkel’, mucha di 15 aña cu kier a drenta KIA cu droga, mucha di 15 aña cu ta ‘joyride’ un auto y un mama di 15 aña. E number 15, por tin algo cu e aña 2015?
- Ainda autoridadnan no por haya ‘Yellowman’ cu a mata un persona cu arma;
- Un homber mata y kima haya den bahul na ‘Franse Pas’;
- Auto haya pata pata cu arma na momento cu polis a bay aresta algun hende cu kier a drenta Aruba ilegal atrobe.
Tur e bolsanan mundial a habri e aña aki cu un perdida. Hasta algun economista respeta mundialmente a bisa cu e aña aki lo ta uno dificil cu hopi reto, pero aki na Aruba nos gobernantenan ta sigui ofrece e pueblo mas fiesta y carnaval enbes di enfrenta e problemanan socioeconomico serio, cu ta destruyendo e fondomen di e sociedad bon y trankil cu nos tabata conoce.
Algo locual hopi hende no por a pensa tabata posibel, a sosode na Argentina, Boneiro, Canada, Scotland, Spaña, Venezuela y actualmente na Brazil. E pueblonan aki a bisa basta na corupcion, manipulacion y partidonan politico tradicional cu no a sirbi e interes general di e pais. Nan a cansa di e mesun mentiranan y nan a vota pa un cambio. Un direccion y un partido nobo. Aki na Aruba, parce cu nos a bira ciego, bira complice di maldad of a perde nos curashi. Nos por cambia e rumbo negativo di e isla aki, net manera e paisnan menciona a haci y cu Aruba a yega di haci tambe den pasado. Dia nos acepta e realidad amargo di e decadencia di nos sociedad, rechasa politica barata, pensa riba nos yiunan y e bienestar general, nos por logr’e. Nunca e ta laat y nada ta imposibel. Algo fout ta keda fout, ni maske cuanto un persona trata di pint’e bunita of cumpra su hustificacion. Corda cu bo cartera nunca ta gaña y e decadencia social y moral no ta un problema di algun hende so. BON ANJA!
(www.aboaruba.org, This email address is being protected from spambots. You need JavaScript enabled to view it.)
Expresionnan haci den e articulo aki no necesariamente ta refleha opinion di ArenaPoliti.co