Andin Bikker (PDR): Trato di minister di infrastructura ta desigual y fuera di principio di bon gobernacion
Andin Bikker a papia tocante e actitud di minister di Infrastructura Benny Sevinger, den rueda di prensa diamars mainta.
Andin Bikker a splica cu e tin un carta cu ta mustra con un persona cu a pidi permiso pa cambia e bestemming di su tereno eigendom, a wordo nenga caminda e minister no kier pa e traha nada riba dje, aunke e ta pa traha un proyecto di casnan social cu hopi falta ta haci na Aruba.
Bikker ta haya cu e minister mester bay splica pueblo di con e persona humilde cu tin tereno propiedad, esta eigendom a base di ROP, cu ta regula e destinacion ta wordo nenga y e ta haya full un letania, pero otro hende cu hasta ta cera na Merca ta djis acerca e mandatario y den un rato di ora e ta bisa ta ok y ta dune 4 mil meter cuadra di tereno erfpacht.
Tabata tin un caso den Corte cu un compania a perde, e minister di infrastructura a core cambia bestemming y a duna e peticionario permiso pa lanta un Boutique Hotel den e area residencial di Malmok.
Segun Bikker e minister mester bay splica pueblo con bin cu e meneer of e señora humilde ey, cu tin un tereno eigendom cu ta e manera mas legal di ta doño di un tereno cu esun erfpacht no por haci nada riba su propiedad door di e ley di ROP.
Bikker tambe ta cuestiona cu na DOW tabata tin un borchi pa avisa cu di tal dia pa cual dia nan ta cera pasobra ta dia di fiesta, tog a core habri y traha full speed pa nan por traha dia 5 di Januari pa bay Notario y minister a firma pa cambia e bestemming di e tereno na Malmok pa bira un boutique hotel.
Tambe pa e persona cu ta detene na Miami den dianan di fiesta a manda su peticion pa tereno y e minister a bisa si ta OK y e pregunta cu PDR tin ta con cerca di e minister e persona aki ta, si ta pa su color di wowo e minister ta kere den dje pasobra e no ta busca ni un sorto di conseho ningun caminda, pero pa esnan humilde den nos pueblo cu a a traha un lugar chikito pa bende lotto of pa bende sandwich, si ta manda cartanan masha rabia pasobra nan a traha algo riba un tereno erfpacht.
Esun deteni na Merca hasta a manda un carta pa minister bisando cu su NV no ta aparece den Camara di Comercio ni Registro di Accionista, pasobra e ta beneficial owner. Asina mes e minister no a busca conseho di ni un hende.
Pa ultimo Bikker a bisa cu tin ministernan cu a lubida full cu tin principionan di bon gobernacion y ta bon pa nan bay un curso na Universidad di Aruba tocante kico ta bestuurs recht, pasobra nan tin un trato desigual entre esnan humilde y personanan cu a resulta cu no tin mucho bon reputacion. PDR su punto di bista ta cu gobierno trata pueblo igual dune su derecho trate cu e respet mereci basa riba e principionan di bon gobernacion!
Asina mr. Andin Bikker a conclui e topico aki.
Expresionnan haci den e articulo aki no necesariamente ta refleha opinion di ArenaPoliti.co