Evelyn Wever-Croes (MEP): Betico a sa di conberti un deseo den un realidad: Libertad di nos pais
BETICO CROES TA UN INSPIRACION PA NOS TUR
STA. CRUZ -- "Nos como Arubiano mester ta hopi orguyoso cu nos a conose un lider di taya manera Betico Croes, un bendicion real pa un isla chikito manera Aruba. Hopi paisnan grandi ta desea di por a conose un Lider asina.
Betico a drenta arena politico y a cuminsa su lucha pa conberti e deseo di nos pueblo pa su libertad, den un realidad. Despues cu Betico a uni na e partido politico AVP, y el'a wordo eligi como Lider di e partido, e doñonan di partido AVP a hib'e corta pasobra un CROES no por ta Lider di AVP.
Esey tabata e momento cu Betico a lanta partido Movimiento Electoral di Pueblo, y asina por a lucha pa logra libertad di nos pueblo.
Betico a realisa cu e deseo di nos pueblo pa ta baas den propio cas, tabata existi di basta tempo, pero cu esey a wordo bandona pa e lidernan di e tempo ey. Un deseo cu a keda bandona pa 30 anja, Betico a sa di conberti den realidad.
Betico a haya un fundeshi, parcialmente basha, bandona pa 30 anja, cu hopi scheur y yerba ta crese den dje. Betico a drecha e fundeshi, caba di trahe, lanta murayanan di e cas di LIBERTAD, basha ringbalk, pone e dak, y dia 31 di december 1985 el'a entrega nos e yabi pa nos lanta nos yiunan den LIBERTAD. Lamentablemente e mes no por a gosa di e libertad ey, pero nos tin e compromiso pa conserva e libertad pa pase pa nos yiunan y nan yiunan.
Riba 25 di januari demostra bo orguyo di ta biba riba e pais aki. Hisa bo bandera, sali bishita e actividadnan, y ban uni como pueblo.
Mi ta invita bo tambe pa e actividadnan di partido MEP dia 25 di januari:
9.00 am Misa na Santa Cruz
10.00 am Ofrenda Floral na Plaza Status Aparte na santa Cruz
10.00 am - 2.00 pm Koffie morgen na Cede di MEP
Pabien Aruba riba Dia di Betico
Expresionnan haci den e articulo aki no necesariamente ta refleha opinion di ArenaPoliti.co