Endy Croes (MEP): Hedging na WEB a costa pueblo di Aruba 280 Miyon florin
Durante reunion den Parlamento tratando presupuesto 2016 a hala mi atencion tambe e caso cu a tuma lugar na WEB esta e hedging. Representantenan di Gobierno den WEB a tuma un decision di acuerdo cu conocemento di Mike de Meza pa hedge fuel oil na un prijs di 90 dollar pa bari pa 3 aña. Pregunta # 288 di fraccion di MEP a cuestiona esaki y a pone hopi presion pa por haña splicacion pa pueblo. WEB ta usa alrededor di 3800 bari di fuel pa dia. Den tur e “hebbe hebbe” di hedge finalmente 1400 bari ta libera y no ta forma parti di hedge. Pues un total di 3800 – 1400 = 2400 bari pa dia ta gehedge pa 3 aña largo. Tin un grabacion di Mike de Meza e tempo aya unda Mike a gaba masha hopi cu a logra hedge 2/3 parti y Mike de Meza den mesun grabacion aki a splica cu ohala por a hedge 100%. Mike de Meza hasta a bin cu e teoria cu crude oil lo sigui subi y lo yega 500 US dollar pa bari na 2015. Tur esaki aparentemente tabata e strategia pa Mike de Meza por a logra duna ordo pa hedge cu facilidad. Ora calcula 2400 bari di fuel pa dia su costo pa 3 aña basa riba 90 US dollar y e diferencia di esaki na un costo di actual di averahe 30 US dollar nos ta yega na e conclusion cu pueblo di Aruba a wordo “horta” of criyoyamente bisa e hendenan aki a tira un para riba pueblo di 280 miyon florin. Si nos analisa cuanto famia tin problema pa paga awa y of no tin awa mes na cas nos mester considera e crimen aki un crimen organiza. “Organized Crime”. Pueblo ta sufriendo caba pa añas cu e prijs di awa di mas halto den region. Awor pueblo tin un sufrimento extra di mira con den region prijs di awa a baha y na Aruba nos a perde e oportunidad di un reduccion di 50%. Gobierno den un palabra a “rip off” e pueblo! Cu 280 miyon florin aki WEB por a exonera tur debe y reconecta tur meter di awa di esnan mas vunerabel. Mike Eman den su campaña a priminti di baha prijs di awa y coriente cu 40% manera AVP drenta gobierno. Na october 2014 nan a laga bati un pueblo cu tabata protesta pa un 15 % di aumento di utilidad. Mi ta lamenta masha hopi tanto engaño di e politiconan comerciante aki. Pueblo nos tin e fe y confiansa cu e gobierno aki lo bay pa bini uno husto unda e pueblo ta central dunando contenido na un programa pa sirbi prioridadnan di pueblo. Aruba “hold on”.
Expresionnan haci den e articulo aki no necesariamente ta refleha opinion di ArenaPoliti.co