Ya a bira custumber cu ki ora ta trata presupuesto di Aruba of un ley importante den Parlamento di Aruba, oposicion ta yama e amigo cu nan tin den Parlamento Hulandes y lagu'e critica gobierno y fraccion di AVP. Ta manera cu MEP mes no tin argumento pa sostene nan punto di bista. Algun dia prome cu tratamento di presupuesto 2016, atrobe e "parlamentario on-call" di MEP den Parlamento Hulandes ta yama Aruba y scirbi na fabor di MEP den corant. Den Parlamento di Aruba e lider di MEP mes ta usa loke e parlamentario Hulandes a bisa y presenta esaki comosifuera ta Hulanda henter a expresa nan mes di e forma ey. E wega aki a resulta atrobe den desventaha pa MEP. Ela cay malo den pueblo. Pasobra e ta mustra riba nan incapacidad den MEP pa atende cu nan trabou y e ta mustra con atrobe MEP ta pidi un parlamentario di un orto pais pa mete den asuntonan interno di nos pais. Anto MEP ta sosten'e den su metemento! Pa colmo e "parlamentrio on-call" aki obviamente no a lesa e documentonan di presupuesto di Aruba. Ora ela wordo confronta cu loke ela bisa, manera semper e conversacion a cambia y a bira uno desagradabel y no al caso. Pa MEP sinembargo e ta fungi como un sorto di "salba bida" pero cu ta traha contra di Aruba.

PROGRESO
Tanto MEP, PDR y e "parlamentario on-call" pa MEP ta nenga e realidad di unda Aruba ta awe compara cu 2009. Pa interes politico pero sin argumento, MEP ta bisa cu cos ta bay malo na Aruba. Aunke ta AVP mes a bisa cu "ainda falta", MEP, PDR y e "parlamentario on-call ta nenga e realidad cu, si no tabata pa e cambionan cu gobierno di AVP a trece, awe mas cu 20 mil pensionado lo ta sin pensioen of en todo caso cu hopi menos entrada tur luna! Anto MEP kier bay bek na e situacion di 2009 caminda a causa e problema! MEP, PDR y e parlamentario Hulandes "on call" ta grita cu economia ta bay malo, pero e realidad ta cu economia di Aruba a recupera for di e crisis hopi mas lihe y a crece hopi mas cu e economia den tur otro tres pais di Reino. MEP, PDR y e "parlamentario on-line" di Hulanda no kier reconoce cu e metemento di Hulanda den asuntonan di Aruba na juli 2014 tabata innecesario, inefectivo y illegal. Apesar di tur e erornan ey, tog economia di Aruba a crece mas cu den algun otro pais di Reino y miho cu hopi otro pais den nos region. Esey ta mustra cu mientras cu e crisis a dal tur pais, algun pais a recupera miho y a limita e daño cu a causa pueblo. Pasobra mientras cu otro paisnan di Reino mester a tuma un sin fin di medida pa sali for di e crisis, gobierno di AVP a saca Aruba for di e dobbel crisis, sin tuma medida y laga pueblo paga pa e daño grandi cu MEP a causa. Ta e realidad aki MEP, PDR y e "parlamentario "on-line" di Hulanda no kier reconoce. Pero no ta niun problema, Aruba manera semper ta sigui su propio caminda riba su propio forsa. E meta ta keda mescos: progreso y bienestar pa tur aki na nos dushi Aruba.

Expresionnan haci den e articulo aki no necesariamente ta refleha opinion di ArenaPoliti.co