Rene Herde: Oposicion no kier sigura pensioen di 6000 trahado y 3000 pensionado. Coalicion MEP/PDR ta vota contra ley y presupuesto
Den un di e reunionnan publico cu a tuma luga recientemente a trata e ley di pensioen nobo pa trahadornan di gobierno y e aumento di e cobertura di tur e pensioennan den APFA pa sigura cu lo por paga e pensioennan awor y den futuro. E ley a wordo aproba cu sosten di AVP. MEP y PDR a vota CONTRA ! Kico esaki kier men?
PENSIOEN DI APFA
E ley nobo di pensioen di APFA pa tur trahador di gobierno, maestronan di scol y otro trahadornan den sector semi-gubernamental, ta sigura cu e trahadornan aki lo haya un bon pensioen den futuro y cu nan ta sigur cu nan lo cobra esaki dia nan bay cu pensioen.
Na 2009 e siguridad di cobra pensioen a disparce door di cu e fondo di pensioen a perde hopi placa y pasobra e gobierno di MEP no a haci suficiente pa salba e fondo. Mescos a sosode tur rond di mundo cu fondonan di pensioen cu a perde riba nan inversionnan den mercadonan di capital. Contrario na loke a sosode na otro paisnan, e fondo di pension di APFA no a corta den e pensioen mensual di pensionadonan. Na otro paisnan e pensionado a haya menos placa tur luna of a perde tur cos! Na Aruba APFA hunto cu gabinete Mike Eman I a traha un plan pa recupera e fondo y no lague bay bancarota. Si a lague bay bancarota e mas cu 3000 pensionado y nan famia lo a keda sin niun entrada. E mas cu 6000 trahado lo a perde e pensioen cu nan ta spera di haya den futuro. Cu e ley nobo cu a pasa siman pasa, a pone e cobertura bek na 100%. Awor tur e 3000 pensionado y e 6000 trahadornan ta sigura di nan pensioen awor y den futuro. E fraccion di AVP a vota na fabor di e cambionan aki cu tambe ta haci cu e edad di pensioen ta subi pa tur hende na 65 aña. E partidonan MEP y PDR a vota contra di e ley. Pero nan no a presenta niun alternativa cu por a logra e mes un resultado pa e pensionado y e trahadornan.
E conclusion cu mester saca di esaki ta cu e partidonan MEP y PDR a scohe pa no sigura e pensionadonan y trahadornan nan pensioen awor y den futuro. Nan djis a bira lomba y a hunga politica populista, pero sin presenta un idea, un sugerencia of un alternativa pa sigura tur e pensionado y trahadornan nan pensioen. Pueblo mes por huzga atrobe ta ki interes a partidonan aki ta sirbi.
Expresionnan haci den e articulo aki no necesariamente ta refleha opinion di ArenaPoliti.co