Actualmente na Aruba tin un total di 36 scol basico cu ta wordo subsidia door di gobierno. E 36 scolnan basico ta parti den e regionan cu tin na Aruba. Den bario di Ayo tin Depedance Ayo cu ta un scol basico cu ta bou di maneho di Maria Goretti College. Pa es motibo e scolnan ta wordo conta como un scol basico. Pa tin un bista di cuanto scol basico cada regio tin, mi a pone e cantidad scolnan basico den un tabel.


Pa medio di rapportnan di enseñansa, mi a yega na cifranan di desaroyo di e cantidad di alumnonan cu ta bay scol basico cu a bin ta desaroya durante añanan escolar. Dos regio cu a aumenta den cantidad di alumno na scol basico durante añanan escolar ta, Noord / Tanki Leendert y Paradera. Pa e desarayo ta visual, mi a trese e cantidad di alumnonan pa aña escolar procedente di cada regio den un tabel dilanti.

A base di cifranan por mira cu regio Noord / Tanki Leendert y Paradera a bin ta aumenta grandemente den cantidad di alumnonan procedente di regionan menciona cu ta bay un scol basico. Si compara e cantidad di alumnonan cu ta bay un scol basico procedente di e dos regionan cu 20 aña pasa, por bisa cu e cantidad di alumnonan cu ta bay un scol basico a redobla. E aumento di cantidad di alumnonan cu ta bay scol basico procedente di regio Noord / Tanki leendert y Paradera tin logica. Si tira un bista den e rapport di Censo 2010, por mira cu e dos regionan menciona a redobla den cantidad di habitante compara cu otro regionan di Aruba. Den e tabel por mira e desaroyo di habitante di cada regio.
A base di rapport di Censo, na 2010 tawata tin un total di 101484 habitante regristra na Aruba. Den un comunicado di 9 di maart, director di Censo a trese dilanti cu actualmente na Aruba tin 119044 habitante regristra.

Durante cu e regio di Noord / Tanki Leendert y Paradera a bin ta aumenta den cantidad di alumno cu ta bay scol basico, den bario di Noord a bin 3 scol basico aserca. Mientras cu den regio di Paradera durante e ultimo 12 añanan escolar a bin un scol basico aserca. A base di rapportnan di enseñansa por yega na cifranan di cantidad di alumnonan na cada scol basico di regio Paradera.
Pa medio di e tabel por mira cu tur scol basico hunto di regio Paradera tin luga pa un averahe di 850 pa 870 alumno. Den e tabel di “cantidad di alumno di scol basico procedente pa regio”, por mira cu den e ultimo añanan escolar tin un averahe di 1160 alumno cu ta procedente di regio Paradera cu ta bay un scol basico. E estadistica ta señala cu tin un averahe di 300 luga menos, compara cu e cantidad di alumnonan total cu ta bay scol basico procedente di regio Paradera. E estadistica ta demostra cu un scol basico mas na regio Paradera ta un necesidad.

Expresionnan haci den e articulo aki no necesariamente ta refleha opinion di ArenaPoliti.co