Parlamentario mr. Xiomara Maduro (MEP): Banco Central mester ta mas pro-activo pa informa comunidad ora cu cosnan no ta bay bon
Nos Pais ta bou di curatela di Hulanda via e supervicion financiero di CFT. Esaki ta asina ya cu Gabinete Eman no a sa di maneha nos finanzas publico na un manera sostenibel. E cosnan a bay for di man y aki ta na unda cu Hulanda mester a asumi su responsabilidad pa asina e Pueblo di Aruba no bay perdi na man di medida door di mal gobernacion. Den e situacion aki no solamente CFT, pero Pueblo en general mester wordo informa adecuadamente di e situacion financiero di nos Pais. Nos mester por haya sa si e trabounan cu Gobierno ta haciendo ta drecha of ta sigi dania e situacion financiero di nos Pais. Pueblo mester por confia cu e informacion financiero cu ta wordo treci pa Gobierno ta cuadra cu realidad y cu no tin triki ta tumando lugar pa presenta un situacion mas bunita cu e ta realmente. Aki ta na unda nos ta di opinion cu un instancia manera Banco Central tin un rol importante y na nos parecer mester ta mas pro-activo pa informa comunidad specialmente ora cu cosnan no ta bayendo bon.
Banco Central ta mucho keto
Banco Central ta forma parti di nos comunidad y den cuadro di esaki tin un obligacion moral pa sali splica Pueblo riba e situacion financiero y economico di nos Pais. Sigur na e momento aki cu nos Pais ta bou di curatela di Hulanda, ta importante pa Banco Central kibra silencio y brinda informacion. Si nos compara tempo cu Gabinete Oduber tabata na mando, na hopi ocacion Banco Central tabata duna informacion y brinda su opinion den conferencia di prensa. Esaki no ta pasando awor mas. Na Parlamento mes, ya un aña a pasa cu Banco Central a duna un bista di e situacion financiero y economico di nos Pais. Ultimo aki CFT tambe a critica e hecho cu e pronostico di crecemento economico di Banco Central ta di aña pasa y mester wordo actualisa cu mas frecuencia. Pues ta muestra cu algo no ta cuadra y cu Banco Central ta mucho keto.
Cifra di deficit pa 2015 dobbel mas grandi
Remarcabel ta cu net despues cu CFT a duna su opinion riba e cifranan di e ultimo kwartaal di 2015, ata Banco Central a publica e mesun cifranan aki pero cu un deficit dobbel mas grandi di locual cu Gabinete Eman a presenta na Parlamento y na CFT. Un diferencia asina grandi merece un bon splicacion y Banco Central na nos opinion no por djies publica e cifranan aki den silencio sin a yama atencion di Pueblo riba e diferencia grandi aki. Pasobra nos ta ripiti, Banco Central ta forma parti di nos comunidad y ora cosnan no ta cana bon Banco Central tambe tin un obligacion moral pa comunica esaki na nos Pueblo na un manera mas pro-activo.
No tin tempo ainda pa Fraccion di MEP
Ya ta tres siman caba cu nos Fraccion di MEP a pidi un cita cu e directora di Banco Central pa asina por haya aclaracion riba e diferencia grandi aki den deficit di 2015. Pero lamentablemente te ainda Banco Central no tin tempo pa atende Fraccion di MEP. Tanten nos a manda preguntanan oficial pa Minister Bermudez pidiendo e mandatario tambe pa un splicacion.
4 april 2016
Expresionnan haci den e articulo aki no necesariamente ta refleha opinion di ArenaPoliti.co