Recientemente Banco Central di Aruba a publica un relato y e esaki a ilustra e realiad di nos pais. Den e relato aki banco Central a bisa cu anja 2015 NO tawata tin crecemento economico, confianza di consumidor den economia ta persisiti pesimista y cu apesar cu turismo a crece cu 14.3%  e crecemento den entrada di turismo a mengua te na 2.8%. Na momento cu tin un disconnect asina grandi entre e crecemento den cantidad y crecemento den cantdiad di placa cu turista ta gasta e ta ilustra cu e calidad di turismo ta inferior y turistanan practicamente no ta gastando placa den nos economia. For di hopi tempo nos ta bin ta informando communidad riba e calidad di turistanan cu ta bin nos pais. Pakiko nos ta cuestiona esaki fuertemente ta pa motibo cu Otmar Oduber a triplifica e budget di mercadeo. Anja 2015 e budget di mercadeo a yega casi 80 miyon florin y e resultadonan ta hopi pober. E crecemento di cantidad di turista ta debi na e situacion economico na Venezuela y eynan e crecemento explosivo tawata. Den casonan normal ora tin turismo ta crece cu double digits e cantidad di placa cu turistnan ta laga atras tambe mester crece cu double digits. Ora esaki no ta e caso ta pasobra e turistnan cu ta wordo registra como turista NO por wordo considera turistanan real. E crecemento cu Otmar Oduber ta broma cune ta un crecemento ficticio.

Nos ta sumamente preocupa cu e desaroyonan den nos turismo mirando cu turistanan no ta gasta placa, hotelnan ta bashi bashi den pleno high season e anja aki, grado di occupacion ta cayendo pa mas cu 11 luna y REV PAR tambe a mira un caida pa 11 luna consecutivo. Mas preocupa nos ta aun mirando e hecho cu Otmar Oduber a haci un apleacion na e fondo di emergencia di ATA pa atrae mas turista mericano. Nos ta preocupa cu esaki pasobra segun informacion cu nos a haya e anja aki Aruba lo bai ricibi miles di asiento menos for di merca (airlift). E ora nos ta puntra nos mes con por ta posibel cu Otmar Oduber ta hinka asina tanto miyones den mercadeo, ta bai usa 20 miyon florin addicional di e fondo di emergencia anto e resultado ta cu Aruba ta perde miles di asiento for di merca pa e anja aki. Nos ta spera cu e noticia aki no ta berdad y cu Otmar Oduber por duna mas claridad riba e noticia fastioso aki.

Mientras Mike Eman ta papia cada rato di crecemento economico y Otmar Oduber ta papia di cuanto placa turistanan ta laga atras, lesa pa boso mes kiko Banco Central ta bisa!Anja 2015 NO tawata tin practicamente NINGUN crecemento!Entrada for di turismo a mengua te na 2.8%!E indicador aki ta duna un bista cla cu turistanan cu Otmar Oduber a trece NO ta turistanan di calidad sino mas bien rugzak toerisme! Preguntanan cu mester wordo haci na nos pueblo:

Esaki ta locual pueblo a vota pe?
Esaki ta locual pueblo kier?
Esaki ta e direcion cu nos kier nos pais bai?

Expresionnan haci den e articulo aki no necesariamente ta refleha opinion di ArenaPoliti.co