Cu atencion PPA ta tuma nota di e tantisimo ponemento di ‘klem’ riba auto/propiedad di pueblo di Aruba cu consecuencia ‘dramatico financiero’ financiero cu e  chauffeurnan lo mester paga f. 75,-- pa kita e klem of despues cu e autonan worde hiba pa Arubus e ta trece cunele cu lo mester paga pa e transportacion di e auto un otro f. 150,-- acerca.  Un abuso di otro mundo !!

PPA ta ripiti cu Aruba NO tin mester di un Aru-parking anto esaki  pa uso di parkeerplaats cu a worde traha cu fondo publico/di pueblo  y no di ningun inversion especial. Esun cu ta pretende cu Aru-parking su presencia y su rol a drecha e situacion den centro di  Oranjestad simpelmente no ta consciente di e realidad amargo aki.

Na prome lugar e trahadornan di cual majoria ta cobra un salario minimo mester paga pa para nan auto mensualmente….ora papia cu e trahadornan aki…varios cu awa na wowo ta splica cu nan realmente no tin e espacio pa paga esaki pero cu nan no tin otro escojencia fuera di para nan auto hopi leeuw y kana na pia…sin e siguridad cu ora nan jega atardia pa tuma nan auto cu algo lo por a pasa cunele.  Na di dos lugar comercio mes su benta den majoria negoshi a bai atras ‘substancialmente’. Varios negoshi cu a funciona anjas den centro di Oranjestad a sera algun publicamente algun den silencio.

Na di tres lugar varios negoshi den centro di Oranjestad ta buscando otro sitio pa ‘huur’ mas tanto riba riba caminda di Ponton pa Noord na unda tin sitio cu nan trajadornan por para nan auto sin cu nan mester paga y na unda tin ‘parkeerplaats’ pa nan clientenan SIN cu nan mester paga pa esaki.

E colmo di tur esaki ta keda cu un gran cantidad di ciudadano cu tabata bai Oranjestad regularmente pa hasi cierto compras a dicidi cu nan no ta bai oranjestad mas pero cu nan ta bai otro sitio unda nan y nan auto no ta pasa den un abuso di ‘ponemento di klem’ na nan auto.  PPA ta keda cuestiona e asunto aki seriamente.  Nos ta contra cu pueblo ta worde abusa di djele pasobra x ministro di Finanzas Mike de Meza alias the Mess a hinca Aruba den un crisis financiero jamas visto cu consecuencia cu gobierno Mike Eman a dicidi cu nan NO ta subsidia Arubus NV mas un deber cu tur gobierno na mundo ta cumpli cunele y ta pa e motibo aki a crea un ARU-PARKING y pa colmo ponemento di klem.

E pregunta cardinal ta keda pa cual motibo gobierno/Arubus/Aruparking  a scoge pa hasi uso di klem cobrando f. 75,00 pa  kita e klem y un f. 150,-- acerca pa transporta e auto si acao e suma di  f. 75,-- no worde paga…un total di f. 225,--  pa e hecho cu lo tabatatin un ‘overtreding’ door di sea a para na un sitio robez of cu no a paga e  parkeergeld di f. 2,--.  E castigo aki pa un suma di f. 2,-- simpelmente no ta balanza e no ta cuadra…e no ta justicia……e ta un abuso di otro mundo.  Por a scoge pa pone un ‘sticker; cu un verbal chikito riba e auto cual ta larga e asunto di pago den man di Ministerio Publico. Pa scoge pa pone  klem na prome lugar parce nos pa esun cu ta cumpra e ‘klem’ kana placa locual a worde proba kaba. Ta bin acera cu ponemento di klem ta causa un pago abusador di f. 75,-- y kizas f. 225,---!! Ta ensera ‘beslag’ riba e auto di e ciudadano pa un suma di f, 2,-- locual ta indica sirbi interes di amigo/friends & family.!

PPA ta rechaza e presencia di un ARU-PARKING y sigur cu e forma aki di funciona…un abuso di nos pueblo di nos trajadornan y un sla ‘diario’ contra comercio di Oranjestad.

Si un tereno priva tabata cobra pa parkeer esey ta nan asunto pero NO e tereno publico traha cu placa publico di pueblo anto pa colmo pa e motibo esencial cu gobierno NO kier paga Arubus NV e subsidio annual cu nan mester paga. PPA ta keda di opinion cu henter e asunto aki ta un abuso hopi serio di pueblo y nos ta pronostica cu lo tin confrontacionan serio den futuro entre  pueblo y trajadornan di aruparking, confrontacionan cu por worde evita  si sea no a introduci e asunto aki of cu a introduciele  sin e asunto di ‘klem’ auto/propiedad di pueblo pa un suma di f, 2,-- un abuso di primera ordo.

PPA kier anota cu no opinion constante ta basa riba e cantidad di reclamo di pueblo cu nos ta ricibi y nos vuelta den Oranjestad pa nos observa e situacionan y ultimo simannan e  reclamo di pueblo a aumenta sumamente hopi.

Gobierno ta abusando di pueblo esey ta e realidad !!

Aruba, 24 di april 2016                                                        Lider Politico di PPA

                                                                                                BENNY NISBET

Expresionnan haci den e articulo aki no necesariamente ta refleha opinion di ArenaPoliti.co