E agencia ta relata cu reapertura di refineria, ta reevalua positivamente rating di Aruba 

ORANJESTAD - Agencia di evaluacion finaiciero-economico FitchRatings ta reafirma e rating di Aruba cu un perspectiva stabiel diabierna ultimo. Banda di esaki, e agencia ta enfatisa cu reapertura di refineria na San Nicolas, ta trece mehora economico y te hasta e ora un rating mas faborabel cu a duna Aruba na e momentonan aki. Perspectivanan pa reapertura di e compleho petrolero situa na San Nicolas ta sumamente positivo segun negociadonan di gobierno.

Representantenan di Fitch Ratings, cu cede na New York, tabata pa algun siman caba na Aruba haciendo nan investigacionnan riba tereno financiero-economico di nos pais. Representantenan di e agencia di renombre internacional a reuni cu un cantidad grandi di agencianan gubernamental y no-gubernamental riba e tema aki, incluyendo Banco Central y CAft. Den nan reportahe e agencia ta splica cu deficit di Aruba a baha di 9,4% pa 2% di GDP den un aña di tempo tambe cu Gobierno ta haciendo progreso den stabilisa finansa publico. “E esfuerzo y empeño di Gobierno di Aruba pa logra sostenibilidad den finanza publico, sigur a wordo reconoci cu e resultado aki,” Minister Bermudez, encarga cu Finanza Publico a declara. “Ademas Fitch Ratings ta indica cu e deficit lo sigui disminui durante añanan binidero”. Na 2017 presupuesto di Pais Aruba ta conta cu un deficit di 0,5% di e GDP. Pa loke ta trata perspectivanan economico, Fitch Ratings ta conclui cu e desaroyonan rond di refineria ta mustra di mehora e 'outlook economico'. E agencia ta mira positivo e meta di Gabinete Mike Eman pa yega pa prome biaha den historia di Aruba na un presupuesto balansa na 2018.

Fitch Ratings ta di opinion cu reapertura di refineria pa CITGO ta bay hunto cu crecemento economico mas halto y contribui na un crecemento y diversificacion di divisanan externo. Pa loke ta trata e situacion, sin cu ta inclui reapertura di e refineria, Fitch Ratings ta premira un crecemento di 2% na 2017 como minimo. “Tur esaki lo cambia na crecementonan hopi mas halto na momento cu e refineria cuminsa cu su operacionan,” Minister Bermudez a splica. Asina cu esaki wordo formaliza, Fitch Ratings lo revisa e pronosticonan economico riba termino mediano. Aumento den consumo priva, reapertura di e refineria y un maneho finaciero exitoso cu ta reduci structuralmente e deficit y e debe nacional, seguramente lo tin como resultado un aumento di Aruba su rating, segun FitchRatings.

Expresionnan haci den e articulo aki no necesariamente ta refleha opinion di ArenaPoliti.co