Andin Bikker, lider di Partido Democracia Real a bolbe papia di e necesidad di bin cu un Corte Constitucional na Aruba y mas lihe cu esaki ta posible.

Bikker a bisa cu el a haya razon cu na Aruba hopi biaha, nos ta haya gobiernonan di un signature, nos no tin coalicion y ta un gobierno sosteni pa un fraccion.

Pesey hopi biaha leynan ta yega Parlamento, cual ta un so nos tin, pero na Hulanda tin Eerste y Tweede Kamer, na Merca ta House of Representatives y Senado, kiermen nan ta bicamara; Aruba ta unicamara.

Bikker a comenta cu nan tin dos camara pasobra e Tweede Kamer, of House of Representatives, hopi biaha ta e ambito politico. Kiermen, nan ta tuma decisionnan politico. Den Senado y Eerste Kamer, nan tey mas bien pa tuma distancia un rato for di e ambito politico y wak con e ley a bin y mire riba su meritonan.

Na Aruba, pa motibo cu un signature so tin y un fraccion pa apoya gobierno, kico cu gobierno presenta, nan ta aproba y nos no tin ni un Corte Constitucional sikiera, manera den otro paisnan cu no tin e luho di ta bicameral.

Sint Maarten tin e Corte Constitucional for di aña 2010, y esaki ta hopi importante, pasobra nan por defini ora un ley a bin pa ta popular, of ora un ley ta anti-constitucional.

Esaki ta e motibo pa cual AHATA ta protesta pe. AHATA no ta contra principionan di e ley cu ta bay regula e competencia inhusto cu tin ora otro tipo di acomodacionnan a cuminza huur camber, cu ta competi directamente cu e hotelnan.

Andin Bikker a bisa cu e ley cu ta bay wordo trata ta bisa, contra nos Constitucion, segun concepto di PDR, cu ora bo bay den un Contrato gobierno ta bisa bo cu no mag di cera contrato.

El a splica cu Raad van Advies a ordena pa e ley aki no presenta na Parlamento pasobra e ta mal traha. E sa di esaki pasobra e tin e background huridico y e ta traha amienda y concepto di ley, ta mira hopi ley mal pensa cu ta yega Parlamento.

“Pa Raad van Advies bisa cu tal of cual ley no ta bon traha, e ta bay Parlamento y door cu un fraccion so ta sostene Gobierno e ta pasa y esey ta e preocupacion” segun Bikker.

E ultimo decadanan nos ta bibando di turismo y ora cu AHATA, e organizacion cu ta representa esnan cu ta yuda carga e economia di nos pais ta bisa cu e ley su intencion ta bon pero e ta mal traha, y Raad Advies ta bisa cu e ley su intencion ta bon pero e ta mal traha, anto nos meter para keto un rato.

Andin Bikker a splica cu e ley aki ta for di aña pasa Minister di Turismo a bisa cu e ta bay bin cune, pues no ta prome biaha cu tin e señalnan aki.

Den Parlamento PDR ta bay observa e ley concerni y ta bay reuni cu tur gremio, y si e ley lo wordo trata PDR lo bin cu su derecho di amienda, pa unda cu por mehore y dreche, pa en todo caso, si e ley aki yega te den Sala di Parlamento, su efectonan lo wordo minimiza pasobra nos no por bay hunga tampoco, cu e unico pilar economico cu ta sostene nos pais, sin mas.

E Parlamentario a subraya cu ora Raad van Advies bisa cu e ley ta mal traha mester duna RvA su balor, e mester wordo revisa y wak na unda ta mal traha y wak si por bin cu otro proyectonan di ley cu por logra e mesun meta pero teniendo cuenta cu e recomendacionnan cu Raad van Advies a duna.

E parlamentario a señala cu pakico tin Raad van Advies anto, si nan ta falta su respet na e estado aki. “Tin cuater tipo di recomendacion cu Raad van Advies por duna: e por bisa “blanco” pues no tin ningun problema cune, y di eynan e por wordo presenta na Parlamento”, Andin Bikker a bisa.

Ora ta wordo bisa cu e ley no ta sirbi y cu e ta contra nos Constitucion y bo como gobierno mester pensa hopi si, pa no obstante cu Raad van Advies, un Colegio di expertonan huridico ta bisa cu e ley no ta bon traha, mester pensa dos, tres biaha si bo ta bay bin cu e ley, of bisa cu bo ta logra loke bo kier logra, anto ban traha un concepto di ley nobo, presente na Raad van Advies pa wak si esey si pa cumpli cu e exigencianan y logra e meta cu nos kier logra: reglamenta algo cu ta un preocupacion comun, Andin Bikker a bolbe bisa.

El a papia di e preocupacion comun  cu tin, cu ta e otro acomodacionnan cu ta competi cu hotelnan cu tin cu paga pa permiso, belasting, etc., cu no ta cumpli cu e exigencianan cu hotelnan si ta cumpli.

E otro aspecto ta cu tin hopi establecimento all inclusive y door di esaki nan ta hayando perdida. “Pa determina si e percepcion cu varios establecimento lo por tin, cu door di all inclusive nan ta keda sin haya “business” e rapport aki no a yega Parlamento. AHATA tambe, den su carta di protesta, ta haci e pregunta unda e rapport ta.

PDR tin informacion cu esaki ta pasobra e rapport no ta back up e concepto aki di Gobierno. PDR ta bay pidi pa e rapport aki y mas ainda cu for di siman pasa tin un sentencia di Corte Comun cu, como gobierno, mester duna tur documento cu a wordo referi na dje ora bo traha un ley. Corte a bisa cu tur documento cu gobierno ta referi na dje cu mester basa atencion riba dje, mester wordo duna na Parlamento pero tambe na pueblo. Si un ciudadano pidi p’e e mester haye y den e caso aki AHATA a pidi p’e y den tres siman nan mester haya un copia, y Parlamento peor, tan pronto a pidi pe via pregunta den Parlamento ta suppose di haye aworaki. PDR ta spera cu gobierno cuminza respeta e Corte Comun aki, y no cu mester bolbe lanta caso pa haya e documentonan” Andin Bikker a finaliza.

Expresionnan haci den e articulo aki no necesariamente ta refleha opinion di ArenaPoliti.co