ORANJESTAD – E manera profesional con Gabinete Mike Eman II y su delegacion a atende henter e proyecto di reapertura di refineria na San Nicolas ta keda demostra no solamente den e acuerdo cu a anuncia diabierna ultimo y ta bay firma proximamente, pero tambe den e manera con ta atende cu e operador anterior, esta Valero.

Minister di Energia, Ing. Mike de Meza a confirma na prensa cu comunicacion cu e operador anterior di e refineria na San Nicolas a bay den bon ambiente. Pronto Palamento di Aruba lo haya debidamente tur pakete cu detayenan di e manera con ta clausura tur asunto pendiente. Ta trata aki di impuestonan, limpieza y traspaso di facilidad, entre otro.

Minister Ing. de Meza a splica na miembronan di prensa durante e conferencia di siman pasa cu ta existi un bon comprondemento entre Valero y Gobierno di Aruba. Siman pasa, Prome Minister Mike Eman y su persona a sinta cu CEO di Valero, Joseph Gorder, ademas di otro Vice-President ehecutivo pa discuti e pakete total. Esaki ta e mesun pakete cu ya caba e delegacion di Aruba ta negociando.

E mandatario no kier a revela detayenan ainda, ya cu segun nos sistema legislativo, Parlamento ta e prome yama pa haya e pakete oficial pa bay over na duna su aprobacion. Loke si Minister de Meza a reafirma ta cu esaki ta un stap cu lo tuma luga pronto, den cuestion di algun siman.

Adicionalmente e titular di Energia a duna di conoce cu ta hopi loke Valero ta laga atras, cuminsando na e facilidadnan. Tin otro aspectonan importante cu e compania Mericano lo mester cumpli cu nan manera su obligacionnan cu e 'Environmental Fund', como tambe otro ahustenan di caracter fiscal, di limpieza; tur conoci caba.

Expresionnan haci den e articulo aki no necesariamente ta refleha opinion di ArenaPoliti.co