Cu pueblo mester tin respet pa un gobernante, esey ta obvio, logico y necesario pa e sociedad funciona bon. Pero igual ta conta cu e gobernante tin cu ta serio, integro y capaz pa sirbi e sociedad su interes y no su propio interes. E no por ta cu e gobernante conscientemente ta keda sin haci su trabou, pa asina debilita structural e funcionamento di e sociedad cu despues uza e debilitacion intencional como un argumento pa hinca e pueblo den mas debe. Esaki ta un acto di mala fe y contra tur bon etica. Tampoco ta berdad cu pueblo tin cu acepta tur locual e gobernante ta bisa, como e berdad pasobra e ta e autoridad maximo. Mayoria biaha, e gobernante no tin un formacion of algun conocemento di e materia y pa haci’e mas pio, tampoco e gobernante kier scucha opinionnan di profesionalnan cu si tin e conocemento den e materia.

E no ta un secreto publico cu cada aña e nivel di nos educacion ta bahando. Y enbes cu algo structural wordo haci pa soluciona e decadencia aki, gobierno semper ta bin cu mil y un comision pa ‘studia’ e situacion atrobe y asina laga pueblo kere cu atencion ta wordo duna na e problematica. Tristo si pa mira cu cada biaha pueblo ta acepta esaki. Ta kisas pasobra cu E gobernante ‘todo poderoso’ a bin cu e idea di un comision, mientras cu en realidad nada ta wordo soluciona? Tur aña e mesun problemanan y tur aña y mesun ‘solucionnan’.

Pues ta dificil pa no pensa si esaki no ta wordo haci intencionalmente, pa asina cada generacion e pueblo bira mas bobo y dependiente di e clase politico tradicional. Un pueblo cu un nivel di educacion abou, no por discuti sano y tampoco riba ‘issues’. Un pueblo cu un nivel di educacion abou, semper lo tuma decisionnan basa riba emocionnan y no riba logica.  Un pueblo cu un nivel di educacion abou, semper lo keda dependiente di otro hende (kisas stranheronan) y nunca lo ta liber pa pensa y yuda su mes.

Den e contexto aki, ta unda algun politico tradicional ta abusa. Algun aña pasa, dos campaña miyonario a wordo ehecuta pa regala muchanan di scol, un computer (Si, mi sa cu hopi hende y politiconan tradicional a lubida riba esaki). Gobierno a bende esaki manera e salbacion pa subi e nivel di educacion. En realidad e tabata un campaña politico, uzando atrobe miyones di placa di pueblo pa gana un eleccion. Locual gobierno a lubida di splica pueblo cuanto miyones e dos campaña a costa pueblo y si realmente e nivel di educacion a subi. Mientrastanto nos tur sa cu e nivel a keda baha, pero asina mes e politiconan tradicional a sigui bende pueblo cuanto miyones a wordo presupuesta pa educacion sin bisa algo di e calidad.

Awor e mandatario actual di Enseñansa, kier bende pueblo e idea cu un ‘IT-Centrum’ central cu lo monitor scolnan cu camara, lo ta parti di e solucion pa modernisa nos sistema educacional (Bon Dia, 30 Mei 2016). Despues cu a bende pueblo añanan largo cu verfmento y pone airco tabata ‘inverti’ den enseñansa, awor un ‘IT-Centrum’ pa monitorea e scolnan a bira e inversion ‘salbabida’ pa soluciona e problemanan den enseñansa. Pa nos di partido ABO, esaki ta nada cu un otro campaña electoral populista pa privilegia un otro compania liga cu hopi miyones. Un proyecto asina no tin prioridad y tampoco e lo yuda subi e nivel di educacion.

‘Que hubo’, si e mandatario corda cu e studiante ta esun central? ‘Que hubo’, si e mandatario corda cu mester inverti den e educadornan enbes di proyectonan miyonario cu no tin prioridad?  ‘Que hubo’, si e mandatario pone e interes general na prome luga enbes di su propio interes personal? Ki dia mandatarionan lo pone e ser humano central enbes di placa y campaña politico?


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co