Ta bay cuminsa cu fase 4, 5 y 6 di Linear Park cu ta bay conecta infrastructura existente na area di High Rise Hotels. 

ORANJESTAD – Minister Benny Sevinger a enfatisa durante conferencia di prensa teni dialuna mainta con e cartera di Infrastructura ta e liña esencial cu ta pasa den tur otro departamento manera Turismo, Deporte, Educacion y tambe Salud. E conexion aki ta visibel sigur den proyectonan manera Linear Park cu ademas di a mehora e prome impresion di e turista, a haya un acogida grandi di parti di pueblo pa ta mas activo na aire liber. E resultado aki ta cuadra cu vision cu Gabinete Mike Eman a pone su dilanti for di comienso y ta uno cu ta bay sigui riba dje mirando e reaccion positivo di e ciudadano.

Minister Sevinger a splica cu e infrastructura di antes cu tabata conoce importancia pa auto so ta keda pa pasado y nos ta kere cu mester duna mes tanto importancia na e persona y espacio di recreacion publico. “Antes tabata construi un caminda y nos ta lubida riba acera of e ta bin despues di 40 aña of no ta bin nunca; y hende tabata sali di nan cas, trapa riba santo, pero auto si ta core riba asfalt. Esey ta un cambio importante den mentalidad.”

Green Corridor ta bay trece San Nicolas mas cerca di Playa, trece cu ne un alivio pa e fluho di trafico pisa cu ta move entre ambos ciudad, pero tambe ta bay trece un desaroyo di areanan publico y un desaroyo economico. Na su bes, Green Corridor ta wordo conecta cu Linear Park na altura di aeropuerto y djey ta sigui.

“Linear Park ta un di e proyectonan cu mas nos ta keda stress cu ta importante pa nos pais. Si ta mira tur atardi cuanto hende ta uza Linear Park, nos mester sigui cu ne,” asina Minister Sevinger a comenta. Den e proyecto di Watty Vos Blvd, cu por cierto ta bay cuminsa prome cu fin di aña, tin e fasenan 4, 5 y 6 di Linear Park cu ta sali for di e crusada di Fatum y ta bay te banda di e hotelnan Phoenix y Riu pa conecta cu e zona di High Rise. Den su ultimo fase, Linear Park ta conecta e area di hotel te na faro California y e beachnan di e area.

“Esaki ta importante pa e desaroyo fisico y di salud di nos hendenan. Gobierno ta mira cu si ta construi algo, hendenan ta us’e y den esey ta trahando y sigui traha riba dje,” e titular di Infrastructura a bisa. Di e manera aki e banda zuid di nos isla cual ta esun mas habita y concentra den actividad comercial, ta bay conoce for di Colony, pasando dor di waf di carga na Barcadera, aeropuerto, centro di ciudad, hotelnan y te na Westpunt, e camindanan y espacionan publico cu ta bay percura pa un miho funcion di tur sector di nos sociedad y tambe un miho calidad di bida pa e ciudadano.

Expresionnan haci den e articulo aki no necesariamente ta refleha opinion di ArenaPoliti.co