Minister Mike de Meza: Instalacion di luz na San Nicolas y rond di Aruba ta haci un cambio grandi
ORANJESTAD – Minister di Energia, Ing. Mike de Meza a compaña Prome Minister Mike Eman diahuebs anochi durante instalacion di e prome puntonan di luz den bario di De Vuyst na San Nicolas. Pa sr. de Meza, esaki ta otro muestra mas di e dedicacion y compromiso cu Gobierno di Aruba tin cu e districto aki. “Esaki ta un bario cu a haya hopi atencion, pasobra Gabinete Mike Eman a ripara cu falta esaki. Loke a pidi p’e ta luz den bario; algo cu ta hopi importante pa tur hende,” asina Minister de Meza a expresa.
Tabata un momento cu tanto Minister de Meza como Eman a disfruta enormemente di a comparti ya cu habitantenan tabata sumamente contento. E titular di energia, encarga cu e companianan di utilidad nacional a splica cu Juanamortoweg pa hopi aña no tabatin luz y e zijstraatnan tambe tabata scur. Un señora a bisa cu e ta biba mas cu 32 aña y nunca e tabatin luz; awo e ta sinti hopi mas sigur y contento hunto cu su nieto paso tin luz.
“Na San Nicolas bo ta mira cu hendenan ta sumamente contento y esey ta laga bo sinti bon pasobra e ta parti di e plan cu Gabinete Mike Eman I y II a bin cu ne. A cambia 12 pa 13 mil luz pa LED di cual 9 mil ta puntonan existente y 40% ta puntonan nobo unda antes no tabatin luz publico prome,” asina Minister de Meza a declara. “E ta algo grandi pasobra e ta proyecto sumamente bon, e LED ta hopi mas eficiente y ta gasta hopi menos y loke bo ta spaar cune bo por pone hopi mas luz den e barionan.”
Por ultimo, Minister de Meza a duna di conoce cu den e dia y lunanan cu ta bin lo pone luz den otro barionan cerca, y mescos rond di Aruba lo mira un cambio grandi. Esnan cu no tabatin, ta bay haya awo y esnan cu tabatin caba ta bay mira un cambio. Como tal, el a felicita un y tur cu e logro aki.
Expresionnan haci den e articulo aki no necesariamente ta refleha opinion di ArenaPoliti.co