Glenbert Croes (MEP): Rikesa di gas y petroleo di Aruba mester bay tur luna directamente den cartera di cada cuidadano di nos digno pueblo
Glenbert Croes referente decision positivo di REPSOL:
Durante conferencia di prensa semanal di partido MEP, Parlamentartio Glenbert Croes a elabora riba e ultimo desaroyonan di e refineria di Aruba y a bisa lo siguiente:
“Di parti di Fraccion di MEP nos ta celebra e noticia cu RESPSOL y TOTAL a dicidi di procede den e siguiente fase di e loke ta e exploracion di gas y petroleo den nos awanan teritorial.
Pa nos Digno Pueblo definitivamente e ta bon noticia pasobra e ta duna indicacion di e perspectivanan positivo cu ta existi den logra encontra gas y of petroleo den nos awanan teritorial.
Pesey cu gran asombro nos kier reitera cu nos te awe NO por compronde e decision y capricho di Gobierno di AVP pa purba y insisti den desmantela e refineria di Aruba. Nos Digno Pueblo lo no lubida con nos mester a bay den e ACCION ORA CERO pa para Valero y Gobierno di AVP pa nan no continuua cu e desmantelacion di e refineria cu lo tawata fatal pa e futuro di nos Pais.
Punto fundamental pa MEP ta pa sigura nos Digno Pueblo cu den un Gobierno nobo di MEP nos lo percura pa e rikesanan di gas y petroleo di nos Pais bay directamente tur luna den cartera di cada cuidadano di nos digno pueblo.
Alavez e ta importante cu parti di e fondonan aki e Gobierno nobo paga y elimina e debe iresponablemente grandi cu ta menasa e existencia y stabiliddad financiero economico di nos Pais y di nos Pueblo.
Door di re-paga y elimina e debe grandi aki alavez esaki lo alivia e situacion financiero prespuestariamente di Gobierno door di reduci y elimina na final un di e post di gastonan mas grandi riba e presupuesto di Gobierno cu ta e interes riba e debe grandi aki cu ta wordo pagá anualmente. Door di re-paga y elimina e post di interes riba prespuesto di Gobierno por tambe cuminsa revoka e medidanan inhusto cu Gabinete Mike Eman a bin ta tumando contra nos Pueblo cu a causa cu e gastonan y costonan di bida a hisa na extremonan cu tur famia na Aruba ta den dificultad financiero tur luna pa purba sobrevivi.
Nos como MEP kier hacie claro desde awor: cu Dios su Poder e exploracion den e fase siguiente aki logra, na e momento cu Pais Aruba cuminsa ricibi e fondonan di ingreso di e rikesa di gas y petroleo, e ingresonan/fondonan aki mester bai directamente tur luna den cartera di cada cuidadano miembro di nos Digno Pueblo. E rikesa aki ta di henter nos digno pueblo y no di gobierno, sr Croes ta termina ta bisa.
Expresionnan haci den e articulo aki no necesariamente ta refleha opinion di ArenaPoliti.co