STA.CRUZ -- Ya ta bai hasi dos siman cu fraccion di MEP a pidi un reunion urgente cu minister Dowers pa atende cu e criminalidad cu tin henter Aruba den ansha. Despues MEP a ripiti e peticion pa minister Dowers bin duna cuenta di tur e acusacionnan cu e minister a hasi den direccion di su ex-colega Otmar Oduber, di ilegalidad y cosnan cu no ta bon, pero mas ainda pasobra minister Dowers a laga sa cu e tin mas cos di conta. 

Sinembargo te ainda e presidente di p[arlamento no a yama e reunion. E pregunta grandi ta: dicon? 
Acaso Mervin Wyat-Ras tin miedo di yama e reunion? 
Acaso Mike Eman a duna orden na Mervin pa no yama e reunion, sino mas puito di sushedad ta sali di e macuto berde? 
Acaso Otmar Oduber a manda amenasa den nan direccion? pasobra Oduber tambe a laga sa cu e tin mas di conta.
Kiko ta e motibo cu un presidente di parlamento ta NENGA un peticion di e partido mas grandi den oposicion pa yama e reunion aki? 

Mientras cu e motibo no ta conosi, y mientras cu prensa no ta presiona e presidente pa e duna cuenta, nos lo sigi bai den e abismo cu Mike Eman ta mandando nos pais. Y ta confirma tambe cu ta Mervin Wyat-Ras tin culpa cu e parlamento ta un stempel-parlement of un "stempel doos" manera e propio Mervin tabata yam'e tempo e tabata den fraccion geel ainda.

MESTER CAMBIA E SISTEMA DI STEMPEL-PARLEMENT
Ta pesey unda cu bo bai hendenan ta bisa cu mester cambia e sistema di parlamento. Mester caba cu e stempel parlement. Mester duna poder bek na e parlamento. Ki mishi un presidente ta sucumbi bou presion di un minister of ex minister, y pesey no kier yama reunion? Ta absurdo!

Ta ora pa cambia e sistema, pa pone parlamentarionan cu tin voz y autoridad pa tuma decision, y no parlamentarionan cu tin masha poco voto y pesey tin miedo di e ministernan cu tin hopi mas voto. Aruba merece mihor, Aruba merese su trankilidad bek y Aruba merese un Parlamento cu realmente ta funciona, y MEP ta bai duna Aruba tur esaki bek.

Expresionnan haci den e articulo aki no necesariamente ta refleha opinion di ArenaPoliti.co