Evelyn Wever-Croes: Aumento di schoolgeld di SKOA ta otro muestra cu gabinete Mike Eman a faya!
Lider di MEP den conferencia di prensa di MEP a expresa su desgusto pa e forma con e mal maneho di Gabinete Mike Eman ta afecta henter nos comunidad, especialmente nos muchanan. Mayornan cu a ricibi notificacion di SKOA cu lo aumenta e schoolgeld ta masha disgusta. Indudablemente tin mayornan cu por paga 250 florin of 400 florin pa cada yiu. Pero tin hopi famia cu no por paga e suma aki. Mientras cu tin "leerplicht" na Aruba, un aumento asina drastico ta perhudica nos muchanan directamente.
E problema a surgi na momento cu Mike Eman y su gabinete a malgasta tur placa di pueblo na cantidad di proyecto cu no tin prioridad. Y awe ainda ta pagando cantidad di placa na fiestamento y biaha mento. Cada dia ta tuma mas hende den servicio, y pesey no tin placa pa duna SKOA na subsidio. Esaki ta un crimen, pasobra un gobierno cu ta soche pa gasta su placa na fiestamento y biahamento, y propaganda, en bes di inverti den nos muchanan, ta un gobierno burdugu.
SOLUCION
"E solucion ta sinta den un vision nobo, den pone prioridad na e ser humano, na e muchanan. Algo cu e gobierno aki no ta compronde. Masha facil e ministernan por baiah poco menos, fiesta poco menos, e minister di ernsenjansa por paga poco menos pa nan hasi propaganda p'e, y inverti e placa ey den SKOA pa asina SKOA por brinda un mihor nivel di ensenjansa.
MEP ta boga pa ensenjansa accesible pa un y tur, y nos lo no descansa te ora nos logra esaki", lider di MEP Evelyn Wever-Croes a declara.
Expresionnan haci den e articulo aki no necesariamente ta refleha opinion di ArenaPoliti.co