Gabinete ME II: Implante di Cochleaire ta un exito na Aruba y ta cla pa expande su beneficio den Caribe
Danki na e sosten di Gabinete Mike Eman I y II.
E hecho cu awendia por haci transplante di Cochleaire na Aruba ta algo cu su propio protagonistanan ta gradici na e sosten ricibi for di Prome Minister Mike Eman y su gabinete. Como tal, nan a invita e mandatario pa realisa e apertura oficial di e simposio cu ta tumando luga diahuebs y diabierna cu participacion di delegacionnan di Aruba, Corsou, Boneiro, St. Maarten y Suriname.
Ta trata di dos dia caminda expertonan local y di exterior ta presenta e posibilidadnan na Aruba y resultado di diferente caso. Tambe lo ta na palabra diabierna atardi un mayor, un pashent, terapista y docente di mucha cu a ricibi un implante pa duna nan testimonio. E simposio ta organisa pa Consultorio di Dr. Cabenda, FEPO, Quota, Med El, Aruba Hearing Instituto & Audiology Center cu asistencia di Ministerio di Salud Publico.
Pa director di FEPO, Sr. Wim Willems, e logro conoci na Aruba ta simplemente e efecto di union, “Connecting the Dots.” Profesionalnan di diferente area, organisacion y sector publico a traha hunto. Willems a demostra su gratitud na Gobierno expresando na e publico: “Danki na Gabinete Mike Eman I cu a pone e medionan financiero disponibel na tempo pa cuminsa e proyecto di prueba y cuminsa cu e implante di cochleaire.”
Specialista di oido, Dr. Cabenda tambe a hiba palabra na e mainta di apertura, mustrando un bista general di e proyecto na Aruba. E dokter a haci echo di e palabranan di director di FEPO, bisando cu “Afortundamente Minister Mike Eman tabatin oido pa nan y a duna e fondonan pa e proyecto.”
Premier Eman ta sinti un satisfaccion hopi grandi di wak cuanto mucha y adulto Arubiano a keda beneficia cu e procedura aki y awor por scucha, pero tambe e oportunidad cu esaki ta representa pa e pueblonan di nos isla y paisnan ruman den e region.
Na su turno, e mandatario a dirigi su mes na e sala y a referi na e ‘Tipping Point’ cu a conoce na Aruba. “Diferente disicplina a percura pa yega na e momento aki. Nos tin specialistanan asina ambicioso, logopedistanan capacita, y otronan cu ta traha cu entusiasmo riba terapia, organisacion FEPO y e sosten politico y di AZV, tur riba nan mes, momentonan special.”
Expresionnan haci den e articulo aki no necesariamente ta refleha opinion di ArenaPoliti.co