Otmar Oduber: ‘Resona’ brindando honor na nos cultura musical
Traspasando Aruba su folklore di un generacion pa otro
Den cuadro di e proyecto RESONA cu ta andando pa algun siman caba, lider di proyecto Michael Lampe ta indica di ta hopi satisfecho con e proyecto aki ta bayendo.
RESONA ta un proyecto cu tin como meta pa salvaguardia canticanan di antes pa asina pa medio di musica concientisa nos hobennan y publico en general pa educa y traspasa nos herencia di un generacion pa otro.
Esaki ta un iniciativa di Ministerio di Cultura, produci pa Michael Lampe como lider di proyecto y cu ta conta cu e sosten di Departamento di Cultura, artistanan, musiconan y profesionalnan local.
Manera wordo bisa anteriormente RESONA a scohe cancionan tipico/folklore cu a destaca den temponan pasa y lo hinca esakinan den un bachi nobo, manteniendo su escencia tradicional. Cu e aspecto musical aki Resona ta contribui pa sigui mantene nos musica folkore riba un nivel halto
Michael a indica cu e personalmente ya pa basta tempo caba, cu e proyecto di Datapanik tabata incorpora musica folklore di Aruba den su produccionan. Esaki ta algo cu ta inspire pa sa mas, usa nos musica tradicional mas y pa trece esaki y hibele pa un generacion nobo.
RESONA tin un tarea sumamente importante pa keda conserva y promove cultura y Aruba su musica folclorico. Ta importante pa carga algun cancion cu ta conoci pa comunidad, tumando na cuenta cu tin cu ta hopi conoci y par cu no ta dje hopi conoci ey y asina mantene esakinan tambe na bida.
E tarea pa a scohe e piesanan mas popular pa yega na e 13 cancionnan no tabata un tarea facil, mirando cu Aruba tin hopi baluarte musical cu a deleita comunidad cu piesanan cu a haci un impacto pa Aruba su cultura..
Cu ayudo di DCA y Maybeline Arends Croes a logra yega na e lista di compositor cu ta consisti di cancionnan di Don Ramon Krozendijk, Bernadina Growell, Padu Lampe, Toty Arends, Vicente Ras, Casin Giel, Gregorio v/d Linden y Mo Tito. Pa por a logra e compilacion aki mester a hiba conversacion cu familiar di cada un compositor, cu mas cu claro a sa di reacciona hopi positivo riba e proyecto aki y sa di brinda sosten inmediato.
Manera por compronde di Michael ta cu e artistanan y musiconan ya tin mas cu 2 siman den studio non-stop grabando pa asina aki yega na e fase final di e produccion pa cd y pa cuminsa cu e preparacionan pa e anochi final cu lo tuma lugar dia 16 di maart na Cas di Cultura.
Resona ta un proyecto hopi interesante, unda cu e sinergia di cada cantante y musiconan cu a wordo acerca a dune un toke diferente pero manteniendo su balor cultural. Esaki ta un otro meta di e proyecto, pa trece concientisacion riba e balor pa nos cultura na Aruba completo pero enfocando riba nos hobennan y tene asina aki na bida.
Expresionnan haci den e articulo aki no necesariamente ta refleha opinion di ArenaPoliti.co