MEP: A pidi reunion urgente relaciona cu protocol di supervision financiero
MEP a bolbe manda yama Mike Eman pa duna cuenta
Den fin di siman Aruba a wordo sorprendi cu e noticia cu Gabinete Eman a firma un protocol cu gobierno di Hulanda. E protocol aki ta relaciona cu supervision financiero di parti CFT riba e proceso presupuestario y saneacion di nos debe nacional. Ta obvio cu firmamento di e dicho protocol aki Minister president Eman a entrega nos autonomia. Esaki ta loke fraccion di MEP a confirma tambe durante e “bijeenkomst” cu a tuma lugar dialuna mainta. Sinembargo Mike Eman no a contesta mayoria di e preguntanan.
A raiz di esaki fraccion a haye di sumo importancia pa hasi un peticion urgente pa trata den su totalidad e contenido di e protocol firma . Fraccion a pidi presencia di minister president y minister di finansas pa atende e debate. Importante pa remarca ta e hecho cu a pidi adicionalmente pa tur corespondencia y documentonan di relevancia cu e protocol ta referi na dje.
Miembronan di fraccion di MEP ta spera cu presidente di parlamento honra e peticion aki pa asina a corto plazo por bai dedabti riba supervision financiero. En todo caso prome cu continua cu debate riba e presupuesto. Realidad ta cu supervision financiero manera e ta prescribi den e protocol awor ta mina autonomia financiero di nos pais y ta pesei nos kier pa e ministernan bin duna cuenta di esaki.
Expresionnan haci den e articulo aki no necesariamente ta refleha opinion di ArenaPoliti.co