Diaranson mainta Minister Otmar Oduber tabata na e Fase II di Linear Park, dilanti aeropuerto pa asina haya mas informacion tocante e proyecto di 320 mil financia dor di TPEF pa embeyece e area cu diferente tipo di mata.
E mandatario a duna di conoce cu por mira e uso grandi cu tin di nos Linear Park y ta finalizando e trabounan di coneccion na Surfisde pa loke ta Fase I y Fase II di Linear Park. Den e cuadro aki y teniendo na cuenta cu e parti di matanan no tabata den e prome parti di trabounan di e Fase II, a aloca 320 mil for di fondonan di TPEF pa sigura cu tin matanan local, di fruta y di decoracion pa duna un tiki color na e Linear Park combina cu e e brazanan di luz cu Elmar a pone pa tin un tiki mas iluminacion.
Minister Oduber ta bisa cu ta importante pa menciona cu ta mira innovacion cu ta bin di tanto Fantastic Gardens como DOW cu a zorg pa tur e sistema di irigacion cu ta hopi importante pa por mantene e matanan hunto cu e ploegnan cu ta encarga. Di e manera aki ta wak cu bou di e fondonan di TPEF no unicamente ta traha proyectonan, pero ta zorg tambe pa mantencion di dje, ademas di zorg cu e mantencion ta mas facil posibel tambe.
Un di e partinan cu ta haci e trabou mas facil ta e tecnologia cu ta wordo implementa ta cu henter e sistema di irigacion ta traha via panelnan solar, es decir, no tin mester instalacion di coriente.
“Mi ta sumamente orguyoso y mi ta kere pueblo di Aruba tambe ta sumamente orguyoso y manera mi ta pidi tur biaha, laga nos comunidad cuida loke ta di nos. Esaki ta propiedad di pueblo, realiza cu placanan cu nos ta genera a traves di e fondo di TPEF y asina nos ta logra haci e tipo di embeyecimentonan asina tur rond di Aruba pa nos por tin un producto pa atrae turista di calidad”, Minister Otmar Oduber a duna di conoce.

Expresionnan haci den e articulo aki no necesariamente ta refleha opinion di ArenaPoliti.co