ORANJESTAD – Durante e Accion di Bario siman pasa den cayanan banda di pa zuid di Caya Grandi, Prome Minister Mike Eman a bishita diferente negoshi chikito estableci den Steenweg y Nieuwweg, pero tambe e habitantenan.

Durante e bishita aki a papia di edificionan monumental cu tin den e area aki y e intencion di Gobierno pa crea un area di renobacion como extension di e renobacionnan cu a cuminsa den Caya Principal. Hustamente den cuadro di e edificionan aki cu a invita Fondo pa Monumentonan pa compaña Prome Minister Eman y Minister encarga cu momumentonan Otmar Oduber, durante e bishita den Steenweg. Asina a menciona dos edificio sigur cu ta wordo considera como monumento, di cual uno tabata esun unda antes tabata SVb y esun net su dilanti, cu awendia ta Palais Hindu.

E delegacion a bishita e edificio di Palais Hindu, cu e mandatario ta haya ta un bunita luga pa Gobierno expone e trabounan cu ta wordo haci den henter e area di centro di ciudad.

Den cuadro di e noticia aki, Prome Minister Eman a duna di conoce cu e siman aki of otro siman ta keda cla e organisacion Renobacion Aruba NV – cu ta un cooperacion entre Gobierno, Institutonan Financiero, y companianan di Seguro, cual lo yuda tambe den restauracion di edificionan monumental. Gobierno su accionnan den e NV aki ta wordo representa pa e edificio unda antes tabata Censo, Bevolking, Eilandsraad.

Manera ta conoci, a cuminsa cu algun trabou di embeyecemento di e parti panort di Caya Principal caba. Na momento cu esaki finalisa, ta cuminsa cu e otro banda di Caya Principal.

Expresionnan haci den e articulo aki no necesariamente ta refleha opinion di ArenaPoliti.co