Diadomingo awor ta un dia special riba cual nos ta celebra hunto cu henter famia Dia di Mama. Aunke tur dia ta Dia di Mama, sinembargo e diadomingo aki ta haya un dimension special caminda mas enfoke y atencion ta wordo poni riba e ser mas stima y aprecia na mundo, esta nos mama. Riba e dia special aki nos tur mester reflexiona riba e rol importante cu nos mama tin den comunidad. E ser stima aki ta esun cu a trece nos na mundo y den trayectoria di nos bida semper el a preocupa pa bienestar y felicidad di su yiunan. E ta e fuente di inspiracion pa nos tur sigui cu nos estudio y pa despues nos traha pa cria nos mes y nos famianan. Un mama nunca ta laga su yiunan na caya y semper ta para banda di nan, den tempo bon y den tempo menos bon.

Ta pesey tur esnan cu tin nan mama na bida ainda mester sigui duna balor na e ser stima aki. Yiunan no mester bandona nan mama nunca y regularmente mester bishita nan mama, tanto esnan cu ta na cas y esnan cu ta den cas di anciano of otro institutonan. E mihor regalo cu nos por duna nos mama ta e aprecio, amor, respet cu nos mester tin pele. Nos comportacion mester ta ehemplar, unda locual nos haci y logra den bida ta pone nos mama sinti orguyoso di nos como su yiunan. Nos mama ya caba treciendo nos na mundo a mustra con hopi e ta stima bida di su yiunan. Pesey nos no mester haci curason di nos mama dolor door di haci cosnan cu no ta bon.

Na esnan cu nan mama no ta cu nan mas y ta cerca nos Creador, hopi forza ariba e diadomingo aki y tuma e dia pa reflexiona riba e balor cu mama tabata tin pa tur su yiunan y haci un bishita na su ultimo lugar di sosiego. Con grandi balor di un mama ta, bo ta sinti’e mas hopi ora cu e no tey mas.

Pabien na tur mama di Aruba ta deseo di lider, sra. Evelyn Wever-Croes den nomber di henter partido MEP y en especial na tur e mamanan di Forza Femenino Grace. Cu nos Dios Tata Todopoderoso drama su bendicion ariba tur mama y duna nan hopi forza, salud, tolerancia, pasenshi y perseverancia. Un feliz Dia di Mama.

Expresionnan haci den e articulo aki no necesariamente ta refleha opinion di ArenaPoliti.co