Chris Romero (MEP): Aña escolar yegando su fin yena cu problemanan sin solucion
Nos ta den e etapa final di aña escolar faltando algun siman pero ainda tin preocupacion enorme riba tereno di enseñansa. Specialmente e normanan nobo pa drenta HAVO ora studiantenan termina MAVO. Den e caso specifico aki e minister encarga cu enseñansa a laga hopi di desea pasobra sabiendo cu e problematica ta andando mas cu un aña caba ainda no tin un solucion pa cu esaki.
Durante tratamento di presupuesto, Parlamento a aproba un mocion unanimamente pa urgi e minister instala un comision pa traha riba e aansluiting di MAVO-HAVO mas pronto cu ta posibel. Un otro problema cu tambe merece atencion ta e introduccion di un extra vak cu lo mester wordo introduci pa HAVO-VWO, pasobra si no haci esaki nos studiantenan lo tin problema den futuro pa continua cu nan estudio superior na Hulanda. Remarcabel ta cu e problema aki lo nifica cu mester bin aun mas cambio pa e alumnonan di MAVO cual ta nifica cu normanan mester wordo ahusta atrobe.
En conexion cu esaki nos fraccion lo manda un cuestionario cu diferente pregunta entre otro 1) Si a instala un comision pa trata e problematica di e overgang di MAVO pa HAVO y ki tempo el’a wordo instala? 2) Con leu e ley ta cu minister ta papia di dje tocante esaki? Kico ta e contenido di e ley? 3) Con ta para cu e extra vak cu lo mester wordo introduci na HAVO y VWO? Por ultimo nos lo puntra si a tene cuenta cu e extra vak aki lo tin consecuencia pa e MAVO schoolnan tambe. Esakinan ta djis un seleccion di e preguntanan cu nos lo ta dirigiendo na e minister. Pa termina nos fraccion kier desea tur studiante hopi exito y forsa den e ultimo simannan aki
Expresionnan haci den e articulo aki no necesariamente ta refleha opinion di ArenaPoliti.co