Resultadonan di enseñansa secundario ta djis un indicacion di e necesidad pa cambio! 

Sea cual sea e problema of preocupacion cu funcionamento di nos enseñansa, pa fraccion di AVP un reforma structural ta necesario. Nos mester siña di loke ta sosode, siña di e intento pa reformanan den pasado manera Priepeb y SHA cu no a wordo completa. Nos meste haci uzo di tur e experiencia aki na Aruba y den exterior pa mehora funcionamento di enseñana. Sea cu ta e echo cu scolnan di enseñansa special ta crece, cu mucho hopi mucha ta keda sinta ya na un edad hoben, sea cu ta e resultadonan demotivante di enseñansa secundario (mavo, havo y vwo) of e cantidad mucho halto di nos studiantenan cu no ta caba nan estudio na Hulanda. Sea cual sea e motibo, nos enseñansa di creche te cu universidad, mester wordo revisa pa duna miho resultado pa tur mucha y hoben y pa desaroyo di nos comunidad awor y den futuro. E perdida di talento, di tempo y di placa ta mucho grandi. No tin hustificacion. Probablemente tin diferente causa. Pero no por sigui accepta e excusa cu ta e alumnonan no ta interesa. Of pio ainda e analysis hypocrita di algun figura cu ta scirbi for di un arrogancia increibel y insinua cu nos mester dijes accepta cu hopi di nos muchanan no por siña. E tipo di splicacionnan aki no merece ni atencion. Loke si mester ta pa stop di discuti partinan y factornan di nos enseñansa den forma separa. Mester di un analysis coherente, objetivo, basa riba analysis educativo y cifranan comparativo, pa yega na e causanan, pa despues scohe sin miedo e miho sistema di enseñansa pa e benidero decadanan.

REFORMA URGENTE
Tin algun tema of area di preocupacion serio cu mester di atencion lihe. Pero mientras ta atende cu esakinan, no por pospone mas e analysis total pa yega na un reforma integral. Temanan manera e necesidad di un miho preparacion di nos studiantenan pa drenta havo y vwo, e miho preparacion di nos studiantenan cu ta bay studia na Hulanda, e miho dominio di idiomanan den enseñansa, incluso e dominio di nos propio idioma Papiamento cu majoria di nos studiantenan ta papia na cas te ora nan yega scol y wordo confronta cu Hulandes. E inefectividad di e reparticion antigua di autoridad entre directivanan di scol y gobierno cu mas y mas ta stroba bon maneho di enseñansa. Tur esakinan mester haya atencion lihe. Pero nan tur ta parti di e reforma total cu e fraccion di AVP ta boga pe. Den bista di AVP, niun cambio isola of riba su mes, no lo duna e resultado cu nos tur kier, pasobra si no cambia henter e sistema e cambionan isola lo tin efecto limita.

REFORMA
E reforma cu e fraccion di AVP kier mester ta dirigi riba un mehoracion grandi di e resultadonan den tur nivel di nos enseñansa. E mester incorpora e profesionalisacion completo y continuo di maestronan di scol, consenso completo riba contenido di enseñansa (= e curiculo) y e forma di duna les y atende cu alumnonan, eliminacion di formanan organisatorio antigua cu nos a hereda for di Hulanda (pero cu nan mes a elimina caba) manera e sistema di "keda sinta" y vaknan separa. E prome fase di e reforma, e analysis, interpretacion y proposicionnan nobo, lo por wordo haci door di un grupo di experto y maestro di scol di Aruba mes cu tin hopi experiencia, hunto cu un grupo di experto internacional manera UNESCO of por ehempel Harvard School of Education. Pasobra e ta rekeri tanto un bon conocemento di comunidad Arubiano y funcionamento actual di enseñansa, como e diseño di sistemanan nobo cu ta cumpli cu exigencianan internacional cu nos hobennan tambe mester cumpli cun'e awor y den futuro. Den bista di e fraccion di AVP, e reforma aki mester cuminsa lihe. No por warda mas.

Expresionnan haci den e articulo aki no necesariamente ta refleha opinion di ArenaPoliti.co