E siman aki UPP a tuma nota di dos acontecimento cu ta regarda e maneho, of mihor bisa e falta di maneho cu a bin ta tuma lugar e ultimo 6 aña den e area di salubridad publico.
Na prome lugar ta trata di e declaracionnan haci door di e presidente di e sindicato ABV, sra. Gina Maduro, y tambe un publicacion cu dr. Jaime Falconi a post riba su facebook personal. Ambos profesionalnan a bin ta reclama e falta di maneho pa loke ta e situacion di e cuido medico na hospital.


UPP a bin ta alerta desde algun aña caba cu tin bastante malcontento pa cu e calidad di servicio medico cu pueblo ta experenciando. Hopi ta e hendenan cu ta crusa lama pa busca ayudo medico na e paisnan bisiña di nos, apesar di ta cubri pa mayoria di e gastonan medico door di e aseguro medico AZV.
Y gabinete Mike E. I y II a prefera di ignora e disgusto cu ta existi cerca e pueblo y a prefera di gasta un cantidad di placa na infrastructura, manera entre otro renobacion di e hospital.
A priminti sí un hospital di 5 strea, pero no a, y lo no aloca suficiente placa tampoco pa mehora e servicio, ni tampoco e posicion financiero di esnan trahando den e area di salubridad.

E sindicato ABV ta den negociacion cu gerencia di hospital pa un CAO nobo.
Di loke nos por a comprende di e declaracion haci door di Gina Maduro, cu atrobe no tin placa pa e trahador di hospital, pero sí tin placa pa nombracion di un di tres director.
Pero tambe manera nos a bin ta bisa pa varios aña caba, pa e mafiosonan di Miami sí tin.
Ta conoci entre otro cu un trahador di hospital lo ricibi un pensioen miserabel na final di su trayectoria laboral. Tambe ta conoci cu hospital no tin suficiente “man na cama”, despues cu a retira alrededor di 54 trahador den pasado, loke ta nifica cu e patient no ta ricibi e cuido debido, y tambe ta nifica cu e peso pa cumpli cu e exigencianan di ehecucion di un bon cuido, a aumenta pa e enfermero/a.
Igualmente dr. Falconi ta referi den su articulo cu mester injecta mas placa den e cuido medico pa por cumpli cu e rekisitonan necesario den ehecucion di un calidad di cuido aceptabel.
Dr. Falconi ta sugeri pa introduci atrobe e “studieopdracht”, y asina garantisa cu e medico cu termina su estudio basico, haña un oportunidad pa sigui un specialisacion, sea na Hulanda of na Latino-America.
Tambe dr. Falconi ta mustra riba e necesidad pa adapta e studio di enfermeria y tambe amplia e posibilidadnan pa enfermeronan na Aruba por sigui specialisa nan mes riba e diferente areanan den salubridad publico.

Ta bon conoci cu ora mi a traspasa e cartera di salubridad na sr. Visser na 2009, ya caba plannan concreto a wordo delinea pa mehoracion di e cuido medico.
A crea e posibilidad di un cuido avansa cardio-vascular na San Nicolas hunto cu un cuido pa diabetes, dialyse y emergencia na ImSan. Alabes a cuminsa cu e tramitenan pa traha un hospital full nobo na un localidad mas mihor accesibel pa e pueblo en general. Y conforme un rapport trahá pa AIB, esaki lo a costa hopi menos, y nos lo a keda sin un debchi di debe.
A start e specialisacion pa dokter di cas na Aruba mes.
Tambe a bishita diferente Hospitalnan Academico na Hulanda cu e intencion pa brinda e mediconan Arubiano e oportunidad di sigui un specialisacion bou auspicio di gobierno cu re-introduccion di un “studieopdracht”.
Nos a otorga 4 studieopdracht di locual dos specialista cu a acepta esaki, ya caba ta trahando na Aruba.
Dos otro specialista cu tambe a haña un studieopdracht, entre otro e actual minister di salubridad, NO a haci uso di esaki.

“Regeren is vooruitzien”, y ya caba na 2001 nos a premira cu salubridad lo tabata tin mester di un empuhe pa por cumpli cu tur e rekisitonan pa mehoracion di e calidad di servicio. E gabinete Mike E. I y II a prefera di hunga politica barata y no continua cu ehecucion di e plannan cu mi a laga atras, asina impidiendo cu e pueblo lo por a gosa di un cuido medico di calidad.
Nos por sigui ignora tur e señalnan cu ta indica claramente cu no tin un maneho pa cu salubridad publico y sigur no un maneho cu lo por tin como intencion mehora e servicio y cumpli cu e promesa di gobierno cu lo percura pa un hospital y servicio di 5 strea.
E minister encarga cu salubridad ya caba a cuminsa dedica mas tempo na cumpli cu su trabou como longarts cu dedica atencion na cumpli cu su tarea como minister, esaki djies pa stroba un yiu di tera traha na Aruba. Parce cu ni su propio colega ministernan ta tume na serio, ya cu te ainda no tin nombracion di un Inspector di Salubridad, loke mester a tuma lugar comienzo di aña caba.
Y parlamento ta sigui permiti cu e minister ta falta nan respet, ya cu ta mas di 5 luna pasa cu e minister lo mester a presenta na parlamento e resultado di e investigacion haci encuanto e problemanan rond di e salanan di operacion.

E falta di maneho aki lo por a wordo considera un hilaridad, un joke, pero e no ta un joke, e asunto aki ta hopi serio, pasobra ta trata aki di salud y bida di hende.
ARUBA Y ARUBIANONAN, QUO VADIS??


Den nomber di Union Patriotico Progresista – U.P.P.
Candelario A. S. D. Wever
Brazil, augustus 9 2015

Expresionnan haci den e articulo aki no necesariamente ta refleha opinion di ArenaPoliti.co