Gabinete ME II: Prome Minister Mike Eman ta anuncia evento ‘Back to School’ pa e fin di siman aki
“Bunitesa y progreso di caya grandi ta resultado di e ideanan cu nos tabatin na inicio di gobernacion 2009”
ORANJESTAD - Prome Minister Mike Eman hunto cu Minister Benny Sevinger a tene hunto cu esnan envolvi den e evento ‘Back to School Bazaar” un rueda di prensa den caya grandi pa anuncia e actividadnan cu ta tuma luga den fin di siman aki. Eman a bisa di ta entusiasma cu e cambionan grandi cu a tuma luga den caya principal di Oranjestad. Cambionan grandi cu ta resalta. “E bunitesa y progreso y e actividadnan creciente aki ta resultado di e ideanan cu nos tabatin na momento cu a start cu e inmenso proyecto ‘Renobacion di caya grandi’ na inicio di nos gobernacion na 2009”.
E actividadnan cu ta tuma luga e weekend prome cu schoolnan rond Aruba habri nan portanan atrobe ta wordo haci den cooperacion cu e organisacion ‘Business Improvement District’ (BID), guia pa sr. Stanley de Marchena. Esaki ta wordo haci cu varios otro organisacion pa di e forma aki crea un dushi ambiente den caya grandi y na mes momento stimula actividadnan comercial. Ta momento pa brinda tanto e hoben como e mayornan e oportunidad pa haci nan compranan di scol. Comerciantenan di nan banda ta bin cu ofertanan special pa e actividad ‘Back to School’. Presente na e rueda di prensa tabata algun di e organisadonan di e Electric Festival pa anuncia pa algun DJ lo ta presente den caya pa di e forma aki duna un tinte extra na e dos dianan aki. Tambe lo tin actividadan deportivo manera Back to Basic Street Soccer, Beach Tennis y MMA. Tur pa duna realce na e actividad ‘Back to School’ y crea un ambiente positivo den caya grandi.
Eman a splica cu ainda trabounan no a caba. “E trabounan di infrastructura ta continua. Minister Sevinger cu ta hunto cu mi aki ta duna un empuhe di dia y anochi na e trabounan aki. Asina ainda tin proyectonan andando pa embeyece e cayanan paralelo na caya grandi den e periodo nos dilanti.” Prome Minister Eman a gradici e organisacion Electric Festival, BoBario, organisadonan di beach tennis, MMA y Santa Rosa cu tambe lo tene su actividad den caya grandi.
Eman a bisa di ta sumamente honra cu e idea cu ta existi un bon cooperacion entre sector priva y sector publico pa haci trabou importante pa nos centro di ciudad. “Di e forma aki tin mas actividad comercial den caya grandi pa asina empleadonan cu ta traha den centro por tin un bon entrada pa nan y nan famia, empresarionan tin entrada riba nan inversion haci. Asina henter Aruba ta conoce e beneficionan di tur e inversionnan cu nos a haci den centro di ciudad.”
Comerciantenan den caya grandi y organisadonan di e evento ‘Back to school’ ta spera di por mira centenares di hende den caya pa disfruta di e ofertanan ofreci y gosa di e bon ambiente cu sigur ta bay tin.
Expresionnan haci den e articulo aki no necesariamente ta refleha opinion di ArenaPoliti.co