Xiomara Ruiz-Maduro (MEP): E discucion mester ta dirigi riba e situacion financiero di nos Pais y no riba legalidad di KB
Ta bisto cu partido AVP no kier papia di e contenido di e rapport di CFT cu ta duna un bista preocupante di e situacion financiero di nos Pais. Nan ta buscando tur cos pa desvia atencion pa no debati riba e contenido di e rapport y tampoco riba e consecuencia cu e investigacion aki ta trece pa e cartera di Pueblo. Awor cu e conseho di Raad van Advies riba e cambionan di presupuesto 2014 a lek, AVP a core tene duro na e opinion di Raad van Advies cu e KB no lo ta legal. Hasta nos Minister Eman a laga sa cu e no por contene su alegria pa e bon noiticia aki cu ta hustifica su welga di hamber. Pero e alegria di nos Minister Eman tabata di corto duracion ya cu Minister Plasterk den su contesta riba e preguntanan di e Parlamentario Hulandes Bosman, a bolbe duna un splicacion amplio pa demostra cu e KB ta legal. For di e contestanan di Minister Plasterk ta bira bisto cu Gobernador tin cu cuida interesnan di Reino cu ta entre otro bon gobernacion. Na momento cu e interesnan aki ta wordo atacha, e Ley ta duna nos Gobernador caminda pa cana y esaki ta hustamente locual nos Gobernador a haci tambe. Pesey cu e splicacion cu Minister Plasterk a duna, nos ta spera cu e wega di AVP pa busca algo pa desvia atencion di e realidad financiero di nos Pais termina. E momento a yega pa pasa na ordo di dia pa trata e rapport di CFT su contenido y consecuencia pa e Pueblo di Aruba. Ya cu e discucion mester ta dirigi riba e situacion financiero di nos Pais y no riba legalidad di KB.
4 november 2014
Expresionnan haci den e articulo aki no necesariamente ta refleha opinion di ArenaPoliti.co