Parlamentario Marlon A. Sneek: E concepto di ley CAFT....... Inconstituional?????? Segun Evelyne Wever Croes.
Mi por a tuma nota di e declaracion di Evelyne Wever Croes hasi durante un entrevista recientemente na unda e ta sugeri y hasta accentua cu aki pais Aruba ta perde su autonomia, si patrlamento asepta e concepto di ley cu ta regarda e CAFT, cual por cierto origen di esaki ta e protocol di 2 di mei cu nos promer minister Mike Eman a firma hunto cu minister plasterk di Gobierno di Reino Hulandes. Mi no por nenga di a keda asombra cu e declaracion aki pasobra den dicho entrevista e la declara cu e protocol y e concepto di ley di CAFT lo ta contra tur ley vigente y cu e ta un hecho cu no mester a tuma lugar nunca. Mester recorda EWC cu aña pasa na juli ora cu Gobernador den nomber di Gobierno di Reino Hulandes a nenga di firma e presupuesto 2014 di pais Aruba, den nos firme opinion tawata enpugna cu nos Statuto di Reino Hulandes, nos a kwalifica e hecho aki como un acto inconstitutional y contra tur regla vigente y no mester bay ripiti tur e consecuencianan y hechonan cu a sigui despues te na firmamento alfin di dicho presupuesto. Gobierno di Reino Hulandes sin mas kier a impone un CFT permanentemente, manera esun di Corsow y otro hermana isla nan. Pero a base di protestanan continuo di nos fraccion di AVP y di Gobierno di Aruba y su insistencia esaki alfinal a keda rechasa y simplemente e CFT a fungi den dos ocashon como un conshero encuanto e presupuestonan 2014 y 2015 di nos pais y nada mas. Lamentabelmente ora pais Aruba mester a para hunto pa e acto inconstitucional aki nos por a mira esnan di MEP y partido Democracia Real gewoon hala un banda y apoya Gobierno di Reino Hulandes den e acto inconstitucional aki y hasta tawata bogando pa Gobierno di Reino Hulandes impone e CFT ala estilo di nos hermana islanan Corsow y Sint Maarten. Gobierno di Aruba y fraccion di AVP semper tawata bogando pa introdusi un begrotingskamer ya for di algun aña atras caba pa asina tin mas control y conseho ora di tratamento di presupuestonan den futuro di pais Aruba. Den e concepto aki semper a papia di tin un miembro cu ta di Aruba pa ta den e begrotingskamer aki, of con lo bo kier yame pa asina mara futuro Gobiernonan na un estricto disiplina presupuetario. Ta di compronde e desesperacion di tanto MEP como Democracia Real su semper a insisti serca Gobierno di Reino Hulandes pa cueste loque cueste impone e CFT ala estilo di nos hermana islanan, mirando cu alfinal Gobierno di Aruba a convence Gobierno di Reino Hulandes pa hala su intenshon atras referente esaki. A sinta na mesa delibera y dialoga y a awe nos tin un LvAFT, pa nos esaki un logro pasobra atrobe esaki ta refleha e deseo di algun aña caba di nos fraccion y Gobierno di Aruba riba introduccion di un begrotingskamenter. Pakiko e ta refleha esaki pasobra den e concepto di ley cu ta regarda LvAFT ta stipula cu Gobierno di Aruba tin su miembro cu e mes ta apunta y Hulanda tin su miembro. Ora mi ta lesa locual Evelyne Wever Croes ta bisa of ta expresa cu e protocol y e concepto di ley di LvAFT ta contra tur regla mi no por compronde su pensamento pasobra netamente e protocol y e concepto di ley di LvAFT ta bari for di mesa tur e hechonan inconstitucional cu Gobierno di Reino Hulandes a comete contra pais Aruba aña pasa ora a ordena Gobernador pa no firma e presupuesto y tabata kier den un forma ad hoc implementa un CFT pa nos pais Aruba. E protocol di 2 di mei firma entre pais Aruba y Gobierno di Reino Hulandes ta haya su legalidad a base di artikulo 38 di nos Statuut na unda ta stipula cu entre gobiernonan den Reino Hulandes por yega o sera acuerdonan mutuo pa bienestar general di paisnan den Reino. Y naturalmente esaki mester keda transferi den un concepto di ley y na unda parlamento tin e ultimo palabra pa aproba esaki.
Expresionnan haci den e articulo aki no necesariamente ta refleha opinion di ArenaPoliti.co