Gabinete Eman yuda pa 13 parlamentario di AVP a legalisa e supervicion financiero di CFT na nos Pais. Cu esaki AVP a demostra cu nan no por a goberna nos Pais responsablemente y enves cu nan a baha na awa, nan a prefera di bay te na e extremo di entrega nan propio autoridad pa dicidi riba nos finanzas publico na Hulanda pa asina otro haya drecha e desaster cu nan tur hunto a haci na nos Pais. Enves di conserva, AVP ta destrui e honor y dignidad di nos Pais.

Un lider entregista
Ta un berguensa pa constata cu nos Pais ta wordo lidera pa un Promer Minister cu no tabata tin boluntad pa defende nos honor y dignidad. Enves di conserva e lucha y e logro di Betico Croes pa nos Pais, Minister Eman a sinta firma yen di protocol cu Hulanda pa asina entrega e lucha aki bek. No ta pornada defunto Wiels a yama nos Minister President Mike de makelaar, spiertando nos cu cada ves cu Minister Eman subi KLM bay Hulanda e ta bende y entrega e autonomia di Aruba bek na Hulanda. Ta tristo cu otro mes a ripara di tempran cu nos Pais ta wordo lidera pa un lider entregista asina y na nos Pais mes un mayoria no kier a realisa esaki na tempo y a bira brinde confiansa pa e bira destrui e honor y dignidad di nos Pais.

Brevet van onvermogen
E parlamentarionan di AVP tampoco no kier realisa cu e KB, entrega di autoridad na Hulanda conforme articulo 52 di Statuut y e supervicion financiero di CFT ta consecuencia directo di nan fayo pa a cumpli cu nan trabou di a controla Gabinete Eman debidamente. Pasobra si tabata tin control NUNCA Gabinete Eman por a logra redobla e debe di nos Pais. Votando pa legalisa e supervicion financiero di CFT pa nos Pais, e parlamentarionan di AVP mes a duna nan mes un ‘brevet van onvermogen’ aceptando cu nan a faya barbaramente y cu nan no tin ni facultad y ni boluntad pa por controla Gabinete Eman. Enves di a conserva, nan a yuda destrui e honor y dignidad di e Pais aki cu nan fayo di control.

Si a goberna drechi no mester a entrega nada
Si Minister Eman a percura pa goberna nos Pais na un manera sincero sin tanto ganiamento, si e no a redobla e debe y endueda nos Pais, si e por a asumi e responsabilidad di anda cu fondo publico na un manera responsabel, awe nos Pais no mester ta pasando den e berguensa di entrega pa laga otro dicidi ya cu Aruba mes no por goberna su mes. Si a goberna drechi no mester a entrega nada. E entrega di autoridad aki ta muestra cu nos Pais ta wordo lidera pa un lider cu ta hopi ZWAK. Cu e ley di CFT, Minister Eman a demostra cu e no tin ni e curashi ni e boluntad pa por conserva, pero a opta hunto cu e parlamentarionan di AVP pa entrega y destrui e honor y dignidad di e Pais aki.

30 augustus 2015

Expresionnan haci den e articulo aki no necesariamente ta refleha opinion di ArenaPoliti.co