Harmonia y positivismo ta reina entre boluntarionan na Parlamento

ORANJESTAD – Riba e di tres dia di trabounan boluntario na Parlamento di Aruba, ciudadanonan ta continua den un ambiente masha anima. Ta reina un aire di union y pas mientras cu e trabounan ta biniendo y cla y ta preparando pa awe tardi haci entrega bek di e edificio drecha na pueblo. Boluntarionan ta expresa solamente mensahenan di reflexion y reconciliacion pa asina e trabou na bienestar di nos isla por continua.

Anthony Geerman ta kere cu esnan cu a haci e dañonan siman pasa awo lo pensa dos biaha prome pasobra nan mes ta realisa cu e no tabata bon y a ripara con hopi hende na Aruba a desaproba nan actonan. “Violencia nunca ta bon,” Geerman a bisa. El a presenta na Parlamento pa tambe colabora despues di a caba cu su dia di trabou.

E ta gosa di e ambiente cu tin entre e boluntarionan cu schouder cu schouder cu Minister y Parlamentarionan, ta drecha, haci limpi y verf. “Nos ta man’e un famia feliz. Loke e hendenan a haci ta eigenlijk uni nos mas cu nunca.”

Xena Profet tambe ta un cu a aporta den e dianan aki y ta duna fe di pensamento cu hopi ta comparti den direccion pa un union den pueblo bisando: “Mi no ta haya cu violencia ta e contesta ora bo ta den desacuerdo cu ponencia di otro hende. Djis traha hunto na un manera constructivo; bin cu bo argumento y sinta papia.”

Hopi biaha ta ser bisa cu den momentonan dificil e miho di ser humano ta bin dilanti y esey ta e caso despues di e acto condenabel cu a keda cometi contra cas di pueblo cu ta nos Parlamento. Leidy Sanchez ta impresiona pa e manera con pueblo di Aruba a bin dilanti pa yuda. Aki e ta referi no solamente na esnan cu ta traha cu Parlamento pero di otro luganan. “Solo ta basta cayente, pero asina mes tin hopi hende trahando. Tur hende ta duna man den tur cos pa entrega edificio di parlamento y pa mustra cu un pueblo uni ta logra cosnan bon,” e boluntario a bisa.

Directiva, personal y miembronan di Parlamento, ademas di Gabinete Mike Eman II y tur boluntarionan ta bay reuni diahuebs atardi pa entrega edificio di Parlamento bek na pueblo. Pueblo henter ta keda cordialmente invita pa forma parti di e momento importante aki. Pa 5:30 di atardi dilanti di Parlamento lo tin un momento di honor y respet pa nos pais caminda ta invita pueblo pa bin bisti na blanco pa reafirma e mensahe di pas y union cu kier trece dilanti y mantene.

Expresionnan haci den e articulo aki no necesariamente ta refleha opinion di ArenaPoliti.co