MEP A DENUNCIA

ORANJESTAD – Lider di MEP a manda un carta pa Procurador general pa investiga e sucedidonan den parlamento diahuebs 27 di augustus, principalmente e hecho cu e presidente di parlamento a permiti personanan arma den e edificio di parlamento. Esaki ta un acto di terorismo ocasiona y tolera pa e propio presidente di parlamento.

Tur esaki tabata socodiendo paden mientras e manifestacion pafo di edificio tabata escalando.

Minister Mike de Mesa a laga un grupo di hende homber drenta y sconde den cushina, causando panico bou e personal cu ta traha na parlamento. Tur esaki ta graba riba video pero awor diripiente ta hasi manera no tin grabacion.

Minister Otmar Oduber a laga sa”si ta sanger boso kier, ta sanger boso ta haya”. Mientras tanto presidente di parlamento a permiti otro grupo di hende homber arma aglomera den e pasiyonan di parlamento. Y esaki ta sin conta e cantidad di fotografo y camarografonan di e ministernan cu tabata cana constantemente y stroba parlamentarionan di hasi nan trabou.

Cu esaki e presidente di parlamento a pone bida di e parlamentarionan di MEP na peliger, y riba dje e y por lo menos un minister mas a actua den violacion di nos Codigo Penal pasobra a impedi un reunion wordo hiba den tur tranquilidad, y sin pone presion riba e parlamentarionan cu por influencia e forma di votacion. Esaki ta un violacion contra nos Codigo Penal cu tin castigo severo riba dje.

Pesey lider di MEP a pidi Procurador General pa investiga e sucedido mas pronto cu ta posible.
Lesa e carta akinan.

Expresionnan haci den e articulo aki no necesariamente ta refleha opinion di ArenaPoliti.co