E belasting riba tereno y propiedad cu cada ciudadano a y ta paga tur aña pa e balor di e tereno y e edificio of cas cu e tin riba e tereno, awor a bira un medida segun MEP. Loke semper tur hende cu tin tereno y edificio riba dje ta paga, awor ta un medida. E ansha di MEP pa critica tur cos, daña bida y yama tur pago cu ciudadanonan tin cu haci un "medida", ta hiba nan na e tipo di barbaridadnan aki. Hasta miembronan di MEP cu a haya oportunidad pa studia pa abogado, ta comete e tipo di disparatenan aki. Lo ta bon pa nan laga nan lider cu ta un experto di belasting, splica nan con y dicon ta paga "belasting riba tereno y propiedad" (=grondbelasting). Dicon miembronan y fanaticonan di MEP ta sigui nenga realidad y berdad, pakico nan ta sigui scohe pa sera wowo y troce berdad, ta keda un misterio.

GRONDBELASTING
E belasting riba tereno y propiedad riba e tereno ey, ta wordo cobra tur aña. Cada cinco aña e balor di e cas y tereno ta wordo ahusta y asina tambe e belasting cu nos tin cu paga. Esaki ta asina pa masha hopi decada caba. Awor aki nada no a cambia. E no ta algo nobo y e sistema di ahusta e balor di cas y tereno tambe ta existi hopi aña caba.

MEP
E partido MEP sinembargo kier bolbe gaña hende y crea e impresion cu ta un belasting nobo cu ta wordo introduci awor. Of cu ta cobra dimas. Tur hende cu tin tereno y propiedad pa hopi aña caba, sa cu tur aña tin cu paga e belasting aki y cu cada cinco aña e balor di cas y tereno ta subi. Cu esey tambe e belasting cu ta wordo calcula riba e balor di cas y tereno ta subi. Rene Herde' di AVP a declara esaki relaciona cu e intento di MEP pa bolbe troce e berdad:"Ta tristo cu e lidernan di MEP tin cu sigui gaña y purba bruha tera y spanta hende. Nan no ta bisa aserca cu e propio lider di MEP pa añanan largo tabata encarga cu supervisa e cobransa di e belasting aki y hopi otro belasting. Straño cu e tempo ey e mes un cobransa di grondbelasting, winstbelasting, inkomstenbelasting y hasta BBO no tabata medida. Mas tristo ta cu bou gobierno di MEP e placa di Pueblo no tabata yega na Pueblo, pero e tabata bay pa e "amigo y famia" di gobernantenan. Awe Pueblo ta wak exactamente unda su placa ta bay y con e ta beneficia didje. Awor diripiente MEP ta troce e berdad riba cosnan cu pa hopi tempo ta sosode. Di berdad, e berdad no por sali di mente y boca di hende cu no por anda cu berdad."

Expresionnan haci den e articulo aki no necesariamente ta refleha opinion di ArenaPoliti.co