Gerick Croes (MEP): Cualidadnan di nos lider actual Evelyn Wever-Croes ta motibo pa aclamacion den Congreso 2015
Semper den un compania of un organisacion ta importante pa sa unda bo kier bay y kico bo kier logra. Den e caso aki e rol di un lider ta hopi importante y determinante pa futuro. Manera ta conoci dia 27 september proximo partido MEP lo mester scoge un lider segun nos statutonan ta delinea. Awor ta conoci cu partijraad a aclama Evelyn Wever-Croes como lider pa e siguiente 4 añanan. Tin motibonan suficiente pa substancia pakico nos mester sigui cu e mesun lider.
Personalmente mi ta haya cu un lider mester tin cualidadnan manera, cu e ta un ehempel, ta entusiasma cu su trabou, capaz, responsabel, sin miedo pero tambe comparti su conocemento. Evelyn ta un persona cu ta wordo confia y ta hiba un bida honesto cu integridad. Door cu Evelyn ta haci loke e bisa e ta inspira confiansa den otronan. Prome cu drenta politica Evelyn tawatin un trayectoria basta largo den mundo fiscal y abogacia. Sigur esaki ta laga e abilidad di resolve problema resalta. E nivel di capacidad y responsabilidad ta cosnan cu bo no por balota ora di scoge pa un lider. Apesar cu Evelyn tur biaha ta wordo critica y hasta tin biaha demonisa den pueblo door di contrincantenan politico el’a demostra cu maldad no por vence bondad. Sin miedo mey mey di tur atake, trabou di dje como lider a sigui. Na cuminsamento mi a trece dilanti cu e ta importante pa sa unda bo kier bay y kico bo kier logra. Wel e caracteristicanan y abilidad cu mi a menciona pa mi ta bay defini e ruta di Movimiento Electoral di Pueblo.
Algo hopi importante ta comparti conocemento. Den nos organisacion politico ami como un hoben profesional y debutante politico cu a bin for di sector priva na varios ocasion a experiencia cu Evelyn no ta tene su conocemento pa su so y esaki ta algo cu nos organisacion mester. Na cuminsamento mi a trece dilanti cu e ta importante pa sa unda bo kier bay y kico bo kier logra. Wel e caracteristicanan y abilidad cu mi a menciona pami ta bay defini e ruta di Movimiento Electoral di Pueblo. Pa e argumentonan aki y otronan mas ami a scoge Evelyn un biaha mas pa ta lider di MEP pa e siguiente 4 añanan den Congreso 2015.
Expresionnan haci den e articulo aki no necesariamente ta refleha opinion di ArenaPoliti.co