MEP TA ORGUYOSO DI SU LIDER 
STA CRUZ – Partido Movimiento Electoral di Pueblo MEP ta den su siman culminante, e siman den cual lo tene e CONGRESO 2015. E Congreso aki no ta uno comun y coriente, sino ta e Congreso cu lo confirma e confiansa den liderazgo di partido.
MEP ta un partido democratico y como tal prome cos a sondea dentro di miembronan si mester cambia liderazgo. E opinion di mayoria tabata cu mester continuidad, y no tin ningun motibo pa cambia e lider actual, especialmente no den e temporada dificil cu nos pais ta pasando.
Despues a sondea si tin interes den candidatonan pa bira lider, pero tur candidato a declara cu awor nan no tin interes. Awor nan tur unanimamente ta sostene liderazgo di Evelyn Wever-Croes.
Di acuerdo cu Statuut di partido Glenbert Croes a propone na Conseho di Partido pa propone un nomber so na Congreso: di Evelyn Wever-Croes. E mocion aki a wordo secunda pa Luigi Bergen, y aproba pa henter conseho di partido, y despues ratifica den conseho di partido extra ordinario, den cual tur presidente y miembronan di tur districto tabata presente. Na forma unanime pues henter e famia di MEP a aproba pa propone na Congreso pa re-eligi Evelyn Wever-Croes.

DICON EVELYN WEVER-CROES
Como un politico cu apenas 6 anja den politica, Evelyn a demostra di por domina e area politico. E ta trese cune e conosemento y experiencia den e ramo huridico y di belasting, e ta trese cun’e su conosemento y experiencia yudando esnan menos afortuna, y mas importante e ta un mama, y sa con pa maneha su hogar. Evelyn ta un hende muher fuerte cu conoce responsabilidad. Y pa e motibo ey henter partido ta confia e responsabilidad maximo den su man pa sigi lidera nos partido, y lidera nos pais.

SOLO TA SALI PA NOS TUR
Y finalmente diadomingo awor, lo ta asina leew. Partido MEP lo lansa e solucionnan pa saca Aruba for di e tempestad, for di e scuridad. Partido MEP lo lansa su vision SOLO TA SALI PA NOS TUR! Y lider di MEP lo elabora con MEP lo logra tur esaki.
Tur miembro di MEP ta keda cordialmente invita, y henter pueblo di Aruba tambe, pa presencia con democracia ta wordo celebra. Bin trempan pasobra e prome 500 personanan cu registra lo ricibi regalonan masha bunita. SOLO TA SALI PA NOS TUR, no falt’e. Diadomingo awor 27 di september, pa 4 or di atardi na Cas di Cultura.

Expresionnan haci den e articulo aki no necesariamente ta refleha opinion di ArenaPoliti.co