Diadomingo 27 di augustus 2015 tin e Congreso di partido MEP, caminda cu sra Evelyne Wever-Croes lo wordo aclama como lider di partido. E decision aki ta uno cu nos tur como candidato, pero tambe lidernan di bario y directiva di partido MEP ta para su tras. MEP ta un partido democratico y semper a cana e proceso democratico aki. Na e momentonan aki nos pais tin mester di un lider cu tin e conocemento, e capacidad y e amor pa e pueblo di Aruba, p’asina pone e hende central un bes mas. Sra Evelyne Wever-Croes sigur tin tur e conocemento y experiencia necesario riba e tereno financiero y fiscal, p’asina resolve e problemanan financiero actual di nos pais.  E ta un persona corecto, integro, pero tambe a demostra cu e tin oido pa esnan mas vulnerabel den nos comunidad.
Na 2009 mi tawata tin e placer di a conoce Evelyne Wever-Croes na momento cu el’a subi lista, y awor pami ta un placer di por traha cune casi tur dia pa mas cu dos aña caba. E ta un persona hopi liher den pensamento y un persona cu ta traha hopi duro pa hiba su pais y su partido dilanti. Ser lider di MEP no ta nada facil pasobra nos tin votadornan hopi critico, sea cu nos ta den gobierno of oposicion. Esey ta pone cu pa ta lider di MEP ta un reto hopi grandi y bo mester tin e curashi y determinacion pa wanta tur e criticanan cu bo ta haya como lider di MEP. E ideologia di nos partido ta social democrata y nos ideologia di tin e hende central ta lo mas importante den liderazgo di nos partido. Sra. Evelyne Wever-Croes ta un dama fuerte y sigur tin e hende central den su vision como lider. Mi ta convenci cu nos lider lo lidera nos partido manera debe ser, y lo hiba nos partido na un victoria na e proximo eleccion. Sra. Evelyne Wever-Croes a demostra cu e tin e amor pa su trabou, y e determinacion pa cambia e rumbo di nos pais pa uno positivo. Mi persona ta sostene sra. Evelyne Wever-Croes como lider di partido MEP y p’asina e guia nos como e partido ganador den e proximo eleccion! A yega e ora pa solo sali pa un y tur riba e pida baranca aki.

Expresionnan haci den e articulo aki no necesariamente ta refleha opinion di ArenaPoliti.co