MEP TA ORGANISA CONFERENCIA INTERNACIONAL DI COPPPAL 

STA CRUZ – Lider di MEP Evelyn Wever-Croes cu hopi orguyo a anuncia cu MEP ta organizando un conferencia internacional e fin di siman aki. MEP lo ta anfitrion pa politiconan di varios pais Latino Americano y Sur Americano den conferencia di e organisacion politico COPPPAL, Conferencia Permanente de Partidos Politico den Latino America y Caribe.

Evelyn Wever-Croes a elabora riba e importancia di e conferencia di COPPPAL pa Aruba. COPPPAL ta e organisacion cu den pasado tabata un sosten enorme pa Betico Croes den felis memoria, pa por a yega te na Nacionnan Uni, y no ta casualidad cu e fin di siman aki e status politico di entre otro Aruba, pero tambe Curacao y Boneiro, lo ta riba agenda. Lider di MEP Evelyn Wever-Croes lo presenta e caso di Aruba y lo splica con Reino no ta cumpliendo cu su obligacionnan hasi na Nacionnan Uni. Den cuadro di decolonisacion Hulanda a compromete su mes na Nacionnan Uni pa sostene e islanan pa nan por emancipa mas, y a cambio Nacionnan Uni a despensa Reino di e deber di mester raporta regularmente riba e proceso aki.

Sin embargo ultimo anja nan nos ta mira cu en bes di emancipa mas, Reino ta stroba nos pais di emancipa. Reino no ta e unico responsabel pa esaki, gobierno di AVP ta mas responsabel ainda, pasobra nan mes ta permiti Reino hasi esaki. Prueba ta e ultimo entrega di nos autonomia financiero. Y tur esaki no ta yuda nos pueblo, pasobra mientras gobierno di Mike Eman ta sigi entrega nos autonomia, a cambio gobierno di Reino ta permiti’e pa sigi endeuda nos pais, pa sigi empobrece nos pais. Ehempelnan ta cu apesar cu e situacion financiero di nos pais no ta permiti, toch ta insisti pa sigi cu e proyectonan di caretera Green Corridor, y ringweg. Ambos por ta proyecto bunita, pero nan no ta necesario na e momentonan aki mirando e prioridadnan den nos pais.

Evelyn Wever-Croes lo trese e tema aki padilanti, y ta spera cu e conferencia di COPPPAL sostene MEP den denuncia esaki na Nacionnan Uni. “Mas sosten nos haya, mas e ta fortifica nos posicion pa e momento cu nos yega Nacionnan Uni. Nos pueblo merece mihor. No ta husto cu Mike Eman y su gobierno ta sigi empobrece nos pais y sigi endeuda nos pais pa simplemente capricho político. Pasobra no tin ningun otro forma pa yama e Green Corridor, e no ta necesario pa Aruba, e ta simplemente un capricho politico. Mirando cu Mike Eman y su gobierno no tin oido pa dolornan di nos pueblo, y considerando e papel dudoso cu Hulanda ta hunga akiden, no ta keda nos otro cu bai na nivel internacional y lucha pa bienestar di nos pais”, lider di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co