Den Haag – Lider di PDR y miembro di Staten di Aruba mr. Andin Bikker a haci un bishita di cortesia na Minister Plenipotenciario Alfonso Boekhoudt.

Durante un encuentro hopi ameno den Sala Betico sr. Bikker y sr. Boekhoudt a papia ariba diferente punto di interes comun. Un punto cu a keda trata ta cu mester sondea e posibilidad cu e Ministernan Plenipotenciario por bin cu un proposicion pa un Ley di Reino (Rijkswet). Na e momento aki ta Hulanda semper ta bin cu un proposicion pa un Ley di Reino y e paisnan autonomo ta propone cambio. Riba e mesun tereno aki e parlamentario y e mandatario a intercambia riba algun Ley di Reino cu merece atencion, manera e Rijkswet cu ta regarda Nacionalidad Hulandes.

Durante e combersacion tambe a papia riba posibilidadnan pa cu transporte duradero na Aruba y cu na mesun momento ta sostenible. A acorda cu lo busca solucionnan factibel existente caba na Hulanda pa siña di dje. Finalmente sr. Bikker a gradici minister Boekhoudt pa e recepcion placentero. E parlamentario ta na Hulanda den cuadro di e clausura di e celebracion di 200 aña di Reino Hulandes.

Expresionnan haci den e articulo aki no necesariamente ta refleha opinion di ArenaPoliti.co