Meta ta pa haci di nos espacio aereo uno mas sigur ainda 

Durante conferencia di prensa di Minister Otmar Oduber relaciona cu uso di idioma Ingles den toren di control, e mandatario a bisa cu awor cu tin un entidad nobo lo percura pa e cumplimento di reglanan y tratadonan internacional manera debe ser.
E mandatario a indica cu a pesar cu tin parlamentarionan cu ta papia otro cos, e ta contento cu diadomingo cu a pasa ora a sinta cu e Asociacion di Controladornan di Trafico Aereo a yega na e palabracion cu mester cumpli cu esakinan, nan tambe a mira e importancia di cumpli cu tratadonan internacional.
E dia ey a palabra cu lo extende e periodo pa e flexibilidad necesario pa por logra cu na juni otro aña por bay cumpli cu loke nos mes a compromete na nivel internacional.
Den e documentacion presenta dor di e mandatario por a mira tambe un di e documentonan di ICAO cu ta splica e pakico nan ta desea pa uso di un solo idioma y esaki ta pa evita accidentenan. Nan ta bisa cu tin causa den e factor idioma cu por conduci na incidente of accidentnan: uso incorecto di frasologianan standariza; falta di capacidad den idioma simpel y e uso di mas di un idioma den e mesun espacio aereo.
Pa loke ta trata e licencia di e personal cu ta traha den e ramo aki, ICAO ta bisa cu tur mester tin un nivel di Ingles nivel 4 y mester wordo certifica, cual ta sosode tambe. Contrario na esaki, nos controladornan aereo no ta cerifica na Spaño y si nan comunica na e idioma aki y algo sosode eyfo, e reponsabilidad ta cay riba Pais Aruba dor di no cumpli cu un tratado internacional.
Minister Oduber como e mandatario encarga cu Transporte a constata cu nos ta haciendo cosnan cu ta bay contra tratadonan internacional cu nos tin y mas ainda, nos ta actuando contra loke nos mes como pais a manda bisa mundo. Pa tal motibo a yega na e palabracion cu e Asociacion di Controladornan Aereo diadomingo ultimo cu lo cumpli cu e tratadonan despues di un periodo transitorio, decision cu a wordo notifica na ICAO tambe. Esaki den cuadro di preparacion tambe pa nos propio sistema di vigilancia cu ANSA lo haya na 2017 y cuminsando entrante 1 di juni 2016 ora cue palabracion cu Corsow lo drenta na vigor di e radar data sharing.
E mandatario a menciona cu el a ricibi rapportnan di Departamento di Aviacion Civil relaciona cu e incidentenan cu a tuma lugar y contrario na loke a wordo publica den prensa dor di miembronan di Parlamento cu a bisa cu lo tabatin un ‘near collision’, tabatin negligencia di  pilotonan cu a distrae, cual ta algo cu a pasa varios biaha, unda cu for di januari pa juni a constata 40 incidente y esakinan a bin ta sosodiendo pa añanan.
Minister Oduber a menciona tambe cu riba iniciativa di controladornan aereo mes, nan ta trahando un lista di e pilotonan cu nan ta sinti cu no ta domina Ingles manera debe ser. Lo tuma lugar un inspeccion dor di Departamento di Aviacion Civil y si constata cu si nan no tin un categoria 4, nan lo wordo poni riba un black list y nan no por bin Aruba. Esaki pasobra na final loke kier logra ta e seguridad den nos trafico aereo y e paso aki lo haci e trabou di e controladornan aereo uno mas eficiente, productivo y cu menos presion.
Finalizando Minister Otmar Oduber a manda un mensahe pa comunidad bisando cu seguridad di aviacion na Aruba ta wordo tuma hopi na serio. “Mi ta convenci cu tur esnan cu ta traha den toren, tur nos controladornan di trafico aereo ta tuma seguridad hopi na serio, mescos cu maneho tambe ta hacie, mescos cu instancianan di control ta hacie y hunto nos lo yega na percura cu esaki unicamente ta mehora y cu nos lo yega na ta un ehempel den mundo pa loke ta trata e forma di mas sigur di opera nos avionnan”.

Expresionnan haci den e articulo aki no necesariamente ta refleha opinion di ArenaPoliti.co