Un gran Arubiano cu a sirbi su pais den diferente funcion: 

Awe partido MEP ta recorda cu 18 aña pasa un baluarte integro y leal na nos partido a bay laga nos, esta ing. Roland Lacle den feliz memoria. Roland Lacle a nace dia 17 di oktober 1939 y a dedica un gran parti di su bida den politica sirbiendo su pueblo y su partido den diferente funcion.

Na aña 1971, esta na e momento cu Betico Croes (q.e.p.d.) a dicidi di forma su propio partido, Roland tabata un di e promernan cu a uni su mes cu Betico y asina a bira co-fundador di partido MEP, un partido cu el’a stima te na su morto. Como un co-fundador di promer ora, Roland a aparece riba lista di MEP for di 1971 te cu 1993 demostrando asina su lealtad incondicional na partido MEP.

Roland semper a kere den libertad di e pueblo aki y asina el’a lucha schouder cu schouder cu Betico Croes pa nos Status Aparte desde e inicio di e lucha te ora cu e Conferencia di Mesa Rondo a conclui exitosamente na maart 1983. Como politico y gobernante Roland tabatin un trayectoria impresionante y a ocupa practicamente tur funcion gubernamental na Antiyas y Aruba. E tabata miembro di Eilandsraad di Aruba, miembro di Staten di Antiyas, diputado di Aruba, Ministro Plenipotenciario Interino pa Antiyas y alavez Representante di Antiyas Hulandes den Mercado Comun Europeo, Ministro di Trafico y Comunicacion di Antiyas. Pa pais Aruba e tabata miembro di Parlamento, Ministro Plenipotenciario y Ministro di Finanzas. Tambe Roland pa varios aña tabata Presidente di MEP y un di e oradornan principal na tur e congresonan di  nos partido.

Dia 12 di oktober 1997 Roland a bay laga nos despues cu el a keda hopi aña sufriendo di un quebrante di salud. Como reconocemento na e gran Arubiano aki, Gabinete Oduber a duna e caretera principal dilanti di Hospital bieu y sigui te dilanti su cas na Paradera e nomber di “Caya Ing. Roland Lacle” y p’asina tene su memoria bibo den comunidad. Roland su espirito di lucha, dedicacion, integridad y su lealtad incondicional na nos partido lo keda semper graba den nos curason. Cu Roland sigui sosega na paz den Reino di Señor.

Expresionnan haci den e articulo aki no necesariamente ta refleha opinion di ArenaPoliti.co