Evelyn Wever-Croes (MEP): Mi kier mira mas atencion pa nos hobennan
Gobierno mester pone mas atencion na ensenjansa
ORANJESTAD - Lider di MEP Evelyn Wever-Croes a expresa su preocupacion cresiente pa e falta di atencion di parti di gobierno riba e tereno di ensenjansa. “Minister Dowers a neglisha ensenjansa totalmente, pero e minister actual ta peor ainda. Y ora bo kere cu e prome minister por pone orden, bo ta mas equiboca, pasobra su prioridadnan ta na biahamento constante. Ta parsec u e no por haya su mes na Aruba, ya el’a inventa otro biahe. Tin asina tanto problema riba e tereno di ensenjansa y e falta di accion di parti di gobierno ta pone e problemanan escala den tempo rapido.
E problema di diploma di HAVO/VWO ta uno hopi critico, un problema cu por perhudica centenares di hoben, y ta parse cu e gobierno aki no tin ningun interes den e problema aki. Mi no ta comprende con e ministernan encarga por drumi trankil sabiendo cu nan ta perhudicando nos futuro generacion. Ta parse cu nan ta hasi esaki deliberadamente.
E falta di atencion na calidad di ensenjansa ta otro preocupacion grandi bou di hopi docente y mayornan, pero no tin placa y sigur ningun atencion di parti di gobierno pa atende cu e punto aki.
E problema di infrastructura na nos scolnan ta birando cada biaha mas serio, y ta poniendo salud di nos muchanan y docentenan na peliger, sin conta cuanto danjo e ta ocasionando na e progreso di e muchanan den nan estudio. Ta increible cu awe ainda, yegando final di 2015, nos no tin un plan di mantencion di nos scolnan, pa garantisa e seguridad di nos muchanan y nos docentenan. Gobierno ta traha con cu ta, y ta ora un problema serio pasa, e ora ta core sera scol y busca solucion.
Finalmente, e scol na Noord cu mester a bira un scol di MAVO/HAVO nunca mas a mira lus di dia. Gobierno a crea cantidad di cortina di huma, pero awor a wordo confirma pa AIB cu e scol aki a wordo sacrifica pa asina por paga pa e tram bin den caya Betico Croes. Mientras tanto no tin ningun clase di atencion mas pa e scol na Noord, algo cu nos di MEP ta lamenta masha hopi mes.
Nos lo sigi boga pa mas inversion den ensenjansa, pa mas atencion na seguridad di nos muchanan y docentenan, y pa e scol na Noord bira un realidad pronto, pasobra nos hobennan merece mihor”, segun lider di MEP Evelyn Wever-Croes.
Expresionnan haci den e articulo aki no necesariamente ta refleha opinion di ArenaPoliti.co